Maneho financiero di Aruba ta deficiente y mescos ta conta pa e responsabilisacion. Sin un maneho financiero ordena no por trece e situacion financiero di Aruba bou control. Asina College Aruba financieel toezicht, CAft ta bisa den un reaccion riba e di cuater reportahe di ehecucion pa 2021.
E reportahe di ehecucion, e UR, ta un compromiso cu Gobierno tin, esta cu ta informa CAft cada tres luna riba desaroyo di e situacion financiero di Aruba.
E servicio di capital di Aruba ta mustra un resultado negativo di 3 miyon florin te cu e di cuater kwartaal di 2021. Asina CAft ta bisa den su carta na Minister di Finanzas Xiomara Maduro. E entradanan/beneficionan ta 37 miyon florin mientras cu e gastonan ta 40 miyon. E beneficionan ta debi grandemente na e depreciacionnan. Pa motibo di efectonan duradero di e coronacrisis a bin un retraso den e maneho pa cobra fianza di estudio pa cual a realisa menos beneficio cu locual a keda presupuesta. E gastonan di 40 miyon ta consisti grandemente di e fianzanan di estudio, otro credito cu Gobierno a duna y inversion. Tambe a presupuesta 21 miyon pa inversion na 2021. Aruba no a usa 3 miyon di e fondo reserva pa inversion.
Deficit y compensacion
Aruba a presupuesta un deficit financiero di 586 miyon florin na 2021. Te cu e ultimo kwartaal di 2021 a realisa un deficit di 534 miyon. Pues e deficit financiero ta cay denter di e deficit financiero maximo palabra cu Gobierno di Reino, cu a keda stipula na 598 miyon. CAft a urgi Gobierno di Aruba pa mas pronto posibel duna un splicacion di e conexion entre e deficit financiero cu tabata permiti, unda ta enfoca riba e placa efectivo (kasbenadering) y e deficit real pa 2021, basa riba un acercamento di beneficio y gasto.
Conforme articulo 17, inciso 3 di e ley di supervision financiero, si e reportahe di ehecucion di e cuater kwartaal ilustra cu tin un deficit, den e mesun reportahe mester inclui medidanan cu ta tuma pa compensa e deficit. Pero na momento cu a entrega e di cuater reportahe di ehecucion, no a indica con ta bay anda cu e compensacion aki.
Sector colectivo
E sector colectivo, incluso e saldo financiero di pais Aruba ta na un resultado negativo di 495 miyon. E otro entidadnan di e sector colectivo, los di Gobierno mes, tin un saldo financiero conhunto di 39 miyon danki na e resultado positivo di Aruba Tourism Authority. E resultado positivo di 24 miyon di ATA ta basa riba e recuperacion economico y aumento di e belasting riba turismo. Na 2022, ATA lo paga e 24 miyon na Pais Aruba den forma di dividendo.
Maneho Financiero
E maneho financiero y ciclo di responsabilisacion di Aruba ainda no ta na ordo, segun CAft. E proposicion di Presupuesto 2022 presenta dia 22 di Februari ultimo na Parlamento ainda no a keda aproba. Consecuentemente no a cumpli cu articulo 13 di LAft, cu ta bisa cu e presupuesto aproba mester keda presenta na CAft pa mas tarda dia 15 di December (red. pues Presupuesto 2022 aproba mester tabata cerca CAft no mas laat cu dia 15 di December 2021). E entrega di cuentanan anual pa 2019 y 2020 entretanto tambe a conoce retraso, cu ta nifica cu no a cumpli cu articulo 17, inciso 4 di e LAft y ley di Comptabilidad di 1989. E retrasonan aki ta resultado den un maneho financiero deficiente. CAft ta opina cu un maneho financiero ordena ta e fundamento pa un Gobierno cu ta funciona bon.
Posicion di debe
E necesidad financiero di Aruba segun Presupuesto 2021 ta di 847 miyon florin. E di cuater reportahe di ehecucion ta mustra cu e necesidad financiero ta di 795 miyon. E suma aki ta comprimi di e deficit di operacion presupuesta y e resultado di e servicio di capital di pais Aruba di 534 miyon, ademas di e refinanciamento di e debenan cu mester paga na un balor di 261 miyon florin. E debe total di Gobierno a suma na fin di 2021 na 5.652 miyon florin ( mas di cinco biyon y mey florin ).
E di cuater reportahe di ehecucion ta mustra cu e debenan di duracion cortico a subi grandemente cu 60 miyon, compara cu 2020. E quota di debe ta na 111 porciento di e Producto Bruto Interno, GDP, unda a usa cifranan calcula pa Banco Central di Aruba riba e desaroyo di GDP nominal. “E ta di gran importancia pa Aruba baha su debe publico y pa yega mas lihe posibel na un nivel (di debe) cu ta sostenibel. Pa tal motibo mes cu CAft ta enfatisa e importancia, manera a palabra cu Hulanda den e protocol, cu ta realisa un surplus financiero di un porciento pa asina frena e crecemento di debe di Aruba,” tabata e palabranan di Presidente di CAft, dr. Raymond Gradus.
