Organo di supervision financiero di Reino pa finanzas publico di Aruba, CAft, a duna nan reaccion riba presupuesto 2020 manera presenta ta na nan pa gobierno. E carta ta fecha 20 di december, pero a bira disponible recientemente.

CAft ta constata cu riba cierto punto e presupuesto ta cumpli cu e normanan stipula den e Protocol di november 2018, pero tin su dudanan tocante e factibilidad di cierto plannan, specialmente na banda di eventual entrada.

CAft ta cuminsa cu bisa cu pa nan e punto di salida ta, ya cu no tin un ley LAft cambia y aproba, cu mester duna e base legal na e supervision, nan ta maneha e LAft manera cu esaki ta, conhuntamente cu e acuerdonan nobo stipula pa e protocol. Esey ta encera entre otro e norma pa e surplus di 0,5% di GDP, unda por constata cu e presupuesto di e ‘sector colectivo’ lo yega na un surplus di 0,6%, pues cumpliendo cu e protocol. Sin embargo, ta observa cu di e suma total, Afl. 55 miyon di entrada ta di caracter incidental. Esaki ta haci cu e desafio pa yega na finanzas sostenible “ta keda manda pa e siguiente añanan.” Esaki no ta deseable, segun CAft, pasobra na 2021 e norma pa surplus ta bira 1% di GDP, mas dificil ainda anto.

Tambe ta constata e situacion unda pa mayoria di e cambionan structural, cu conhuntamente ta trece Afl. 111 miyon aden, mester pasa legislacion ainda. Tin medida cu en todo caso sí tabatin un bon base di cifra, manera introduccion di BBO riba importacion, aumento di ‘deviezenprovisie’, aumento di impuesto riba turismo y e introduccion di un ‘G-rekening’. (un cuenta bancario blokea, un ‘escrow account’, unda un contratista grandi o un otro empresa cu ta contrata empleado di otro o ta subcontrata trabao, mester pone e prima y impuesto cu mester bay pa gobierno). Cierto medida ainda tin elemento menos sigur den nan argumentacion. Ta p’esey CAft no tin e certeza cu e medidanan structural aki lo percura pa e entrada proyecta. Ta constata tambe cu aki no a duna contenido na e acuerdo cu e entradanan lo a haya un splicacion solido. Tambe cu e limitacion di e gastonan di personal (incluyendo e gastonan di personal di e Plan di Crisis Social), no ta suficientemente clarifica y argumenta.

“CAft ta haya cu no ta suficientemente sostenible cu den forma limita ta propone reduccion na banda di gasto pa 2020, mientras na mesun momento ta sigui aumenta e peso riba poblacion, empresario y turista.” Den e cuadro aki por mustra tambe riba e aumento di 1% di tax pa turismo, algo cu te na e momento aki no tabata conoci. For di fuente den e sector nos a comprende cu no tabatin aumento di tax planifica pa e aña aki.

Ta remarca tambe cu na 2019 tabatin beneficio no anticipa (‘meevallers’) di Afl. 14,3 miyon cu a dedica na cubri gasto. CAft ta bisa cu esaki ta bay contra e acuerdonan di e protocol, cu cual tambe e debe cu ta considera masha halto, a keda reduci di manera insuficiente. CAft ta di opinion cu si no ta pone e ‘meevaller’ ey disponible pa reduci debe, anto mester crea limitacion di gasto adicional den presupuesto 2020.

Tin presupuesta na entrada categorisa Afl. 28 miyon cu ta di dividendo cobra di CBA, Utilities NV y ATA. Di nan ta spera un contribucion di Afl. 60 miyon pa 2020. Un parti di e aumenta aki (Afl. 13 miyon) ta keda elimina pa 2021, di manera cu un parti ta parce structural, aunke no tin claridad completo riba esey.

Gasto.
Gastonan pa 2020 ta aumenta cu Afl. 30 miyon compara cu 2019, di Afl. 1.438 pa Afl. 1.468 miyon na 2021. Tin reduccion den gasto den pago di interes y reduccion di costo di overtime. Di otro banda tin e aumento fuerte di Afl. 41 miyon den pago pa proyectonan PPP, mas gasto di ‘Bienes y servicio’ y un contribucion mas grandi na AZV.

E gastonan di personal pa 2020 ta mara na e limite acorda di Afl. 479 miyon. Ta logra contene e gastonan via un maximo di overtime na nivel di persona. Tambe a corta na otro lugar pa acomoda e crecemento ‘autonomo’ di payroll: e gastonan di promocion y pago di ‘periodiek’; alavez a corta extra pa por incorpora e Afl. 4 miyon di e gastonan di personal di e Plan di Crisis Social. Ta constata si cu e medidanan aki no ta cuantifica pa cada medida riba su mes y falta tambe un time schedule, manera a pidi na varios ocasion anterior, e organo ta remarca.

Pa loke ta e gastonan cu Serlimar, e organo supervisor ta comenta cu a aumenta e contribucion na e servicio aki, pasobra no por cobra optimalmente e clientenan. Ta recomenda pa resolve e problemanan legal y resolve e problemanan existente cu cobranza cerca e servicio, pa por evita cu gobierno mester contribui na esaki. Tambe ta conseha pa elimina e obligacion cu gobierno tin pa compensa cualkier deficit cu Serlimar tin.

Pa loke ta administracion financiero CAft ta haya cu gobierno a dal algun paso importante den e set up di presupuesto, haciendo esaki mas facil pa lesa y a haci e presupuesto mas transparente. Tambe a reserva placa pa fortifica e funcion financiero, cu un acuerdo cu Stichting overheid accountantsbureau (SOAB) pa haci un investigacion encuanto investigacion autonomo di aña 2019 y pa haci control di cuenta anual 2020.

CAft tin un opinion bastante positivo di e ‘sector colectivo’ y ta haya e resultadonan di e entidadnan realistico. E saldo di e sector en total ta 0,6% di GDP, dentro di e norma stipula.

Varios pregunta di CAft a haya contesta di e minister encarga cu finanzas den su carta fecha 14 di januari 2020, riba cual Bon Dia Aruba a reporta diasabra 18 di januari ultimo.