E debate tocante calidad di enseñansa na e parti Caribense di Reino y posicion di Papiamento como idioma di instruccion a haya atencion renoba na Den Haag. Durante un debate reciente Parlamentarionan di GroenLinks-PvdA ta expresa nan preocupacion pa e calidad di enseñansa cu riba e islanan di Caribe y e reconocemento y sosten limita di idiomanan local. E grupo parlamentario ta enfatisa e necesidad pa mehoracionnan structural, aunke gobierno ta actualmente den status demisionario.

E Parlamentarionan ta considera enseñansa un componente nucleo di sociedad y un medio esencial pa promove oportunidadnan igual. Sinembargo, nan ta mira problemanan persistente den e parti Caribense di Reino—Boneiro, Sint Eustatius, y Saba—y tambe den e paisnan autonomo di Aruba, Corsou, y Sint Maarten.

Na varios nivel, no tin suficiente maestro cualifica, oportunidadnan limita pa desaroyo profesional, y un scarsedad di material educativo adapta na e contexto local. Ademas, e parlamentarionan a indica cu studiantenan riba e islanan ainda hopi biaha ta experiencia oportunidadnan desigual compara cu nan equivalente na Hulanda Europeo.

Aunke e islanan ta carga nan propio responsabilidadnan dentro di Reino, Tweede Kamer ta mira espacio pa un cooperacion mas grandi pa medio di e Ministerieel Vierlandenoverleg. Segun fuentenan na Den Haag, e consulta aki por ser usa pa sostene mehoracion y reforma den enseñansa riba un base boluntario. Aruba, cu tin su propio structura y politica educativo dentro di Reino, ta hunga un rol special al respeto. Na Den Haag ta vigila e experiencianan di e isla cu enseñansa bilingual, introduccion di Papiamento den enseñansa primario, y su afiliacion cu universidadnan regional.

Un punto clave di atencion pa e parlamentarionan ta concerni diversidad linguistico den seno di Caribe Hulandes y e paisnan autonomo. Hopi biaha ta papia Ingles, Spaño of Papiamento den bida diario riba e islanan. Normalmente Hulandes no ta e idioma nativo, pero ta keda importante como idioma di enseñansa secundario y di comunicacion oficial dentro di Reino.

Den e cuadro aki e miembronan di Parlamento ta enfatisa cu Hulandes ta particularmente valioso como parti di un perspectiva multilingual mas amplio. E idioma por engrandece e oportunidadnan di futuro di residentenan, por ehempel, ora di studia na Hulanda of colabora dentro di Reino. Na mesun momento, e parlamentarionan ta enfatisa cu e politica di enseñansa mester tene cuenta cu e idiomanan nativo di e studiantenan.

Papiamento ta ser considera como un activo cultural importante dentro di Reino. E idioma ta ser papia pa aproximadamente un cuarta parti di un miyon hende y ta un parti esencial di e islanan su identidad. E parlamentarionan ta reconoce cu e diferencianan entre e Papiamentu di Boneiro y Corsou y e Papiamento di Aruba ta sinta primordialmente den ortografia y etimologia, no den structura linguistico. Sinembargo, mantencion di multiple variante di ortografia ta forma un reto pa e desaroyo di materialnan di enseñansa y recursonan digital.

Legislacion Hulandes ta inclui ehempelnan di e reconocemento di idiomanan regional, manera e Ley di Uso di Idioma Fries na Friesland. Ta surgi e pregunta si reconocemento huridico similar pa Papiamento na Boneiro, of posiblemente mas ampliamente na Caribe Hulandes, ta deseabel y realisabel. Segun esnan cu ta traha politica na Den Haag, e reconocemento ey por contribui na aumento di atencion institucional, financiamento y desaroyo di metodonan di enseñansa den e idioma local.

Banda di esaki Den Haag ta sondeando maneranan pa fortalece e estudio academico di Papiamento. Na 2024, Tweede Kamer a adopta unanimamente un amienda pa reserva un contribucion structural di €340 mil pa aña pa un programa di Bachelors na Fries na un universidad Hulandes. Awor tin yamadonan pa sosten structural similar pa un programa enfoca riba idioma y cultura Papiamento. Esaki lo permiti Reino impulsa investigacion academico y preservacion di e idioma como herencia cultural.

Idioma ta hunga un rol no solamente como materia pero tambe como un vehiculo pa transferencia di conocemento. Expertonan den enseñansa ta señala cu dunamento di les den e idioma materno ta fortalece e comprension y prestacion di enseñansa di mucha. UNESCO y e Conseho di Enseñansa a recomenda anteriormente pa integra structuralmente e idioma di cas den enseñansa, ya cu esaki no solamente ta sostene siñamento di otro idiomanan pero tambe ta contribui na desaroyo di identidad positivo.

Varios acercamento ta existi caba na Caribe Hulandes y Aruba. Algun scol ta ofrece enseñansa bilingual, combina Hulandes y Ingles of Papiamento. Desde 2013, Aruba ta usando un modelo den cual Papiamento ta hunga un rol prominente den e prome klasnan den educacion basico, despues cu gradualmente ta agrega Hulandes y Ingles.

Sinembargo, ainda tin debate tocante e balansa optimal. Algun experto ta boga pa un modelo den cual Hulandes y Papiamento ta ser usa pareu. Esaki lo refleha realidadnan cultural, pero tambe ta rekeri cu maestrp y inspectornan tin suficiente dominio di idioma den tur dos idioma. E pregunta ta keda con esaki por ser organisa den practica y ki sosten mester di Den Haag.

Banda di calidad di idioma y enseñansa, e parlamentarionan tambe a atende cu e condicion fisico di edificionan di scol. Scolnan riba varios isla ta sufri di mantencion atrasa, espacio limita den klas, y infrastructura digital inadecua. Na Hulanda Caribense tin biaha lesnan ta ser teni den aire liber debi na falta di klas, mientras cu mal tempo ta obliga scolnan pa cancela les. Conexionnan di internet hopi biaha ta instabil, haciendo recursonan di enseñansa digital dificil pa usa.

E Secretario di Estado pa Enseñansa, Cultura y Ciencia a indica den un memorandum anterior cu a firma pacto na cada isla pa loke ta trata proyectonan di construccion y renobacion. Sinembargo, e liña di tempo pa finalisacion ta varia di isla pa isla, y no ta premira cu henter e proyecto lo keda cla te cu 2028. Pa Aruba, cu ta responsabel independientemente pa su infrastructura educativo, tambe ta vigila e desaroyonan, particularmente cu bista riba compartimento di conocemento y colaboracion dentro di Reino.

Un ambiente di enseñansa stabiel y sigur ta un otro rekisito pa un bon educacion. E parlamentarionan a referi na un investigacion recien riba seguridad social na un scol na St. Eustatius, caminda Inspeccion di Enseñansa a haya faltanan serio. E incidente a subraya e importancia di bon gobernacion, supervision adecua, y e rol di Inspeccion den e contexto Caribense.

E pregunta di parlamentarionan si inspectornan tin suficiente conocemento y dominio di Papiamento pa evalua lesnan den e idioma ey tambe ta relevante pa Aruba. E realidad linguistico riba e islanan ta rekeri inspectornan cu experticio specifico, garantisando cu garantia di calidad ta alinea cu e situacion local di enseñansa.

Ta anticipa cu e Conseho di Enseñansa lo presenta un estudio nobo tocante enseñansa den Caribe Hulandes na comienso di 2026, hunto cu e comisionnan insular di Boneiro, St. Eustatius, y Saba. E estudio aki lo probablemente inclui tambe recomendacionnan riba politica di idioma, infrastructura y desaroyo di personal.

E speransa na Den Haag ta cu pa e tempo ey, ministerio di Enseñansa, Cultura y Ciencia tambe lo tin un comprondemento cla di kico ta posibel y necesario pa fortalece enseñansa den e partinan Caribense di Reino. Aruba sigur lo no keda afo di e cuadro aki. Den e ultimo añanan, e isla a demostra cu, a pesar di recursonan limita, e ta dunando pasonan den educacion di idioma, digitalisacion, y cooperacion internacional.

E periodo venidero lo mester clarifica con Hulanda, Aruba, y e otro islanan lo forma mas ainda nan responsabilidad comparti dentro di Reino. E compromiso ta cla: enseñansa y politica di idioma no solamente mester cumpli cu normanan huridico pero tambe mester refleha e realidad cultural y social di e islanan. Ta asina so tur mucha, unda cu nan ta dentro di Reino, por haya oportunidadnan igual pa desaroya nan talentonan.

Di nan parti partido VVD ta yama atencion specificamente riba e relacion entre Hulandes y Papiamento den enseñansa. Miembronan kier sa si a establece obhetivonan di siñamento cla pa Hulandes y con esakinan ta relaciona cu uso di Papiamento den enseñansa primario. Segun VVD, diferencianan den dominio di idioma actualmente ta conduci na oportunidadnan desigual pa studiantenan. P’esey e partido ta puntra kico ta e cambionan necesario pa garantisa oportunidadnan educativo igual.

Partido NSC a pone enfasis riba conservacion y fortificacion di Papiamento, pero simultaneamente ta mustra riba e falta di material di enseñansa adecua den e idioma aki. Segun e partido, e calidad di enseñansa primario riba e islanan ta preocupante, y falta un politica cla pa loke ta trata e rol di Papiamento banda di idiomanan mas grandi manera Hulandes. NSC ta enfatisa cu desaroyo di idioma balansa ta esencial pa futuro di studiantenan di Caribe, ya cu dominio insuficiente den un di dos idioma ta limita nan oportunidadnan den mercado laboral.

E partido ta haci un yamado na e Secretario di Estado pa aloca recursonan adicional pa material di enseñansa di Papiamento y pa priorisa calidad di enseñansa na nivel di Reino. Tambe NSC ta pidi un reflexion riba e rol di inspeccion di enseñansa den Caribe.

Fraccion di BBB a tuma nota di e documentonan pero no a entrega pregunta.

E debate un biaha mas ta subraya e balansa compleho entre idioma, identidad, y oportunidadnan igual den enseñansa Caribense.