California prome estado cu ley pa proteccion di privacidad di muchanan

(AP) – California lo ta e prome estado cu lo rekeri companianan online pa pone e siguridad di muchanan den prome luga pa medio di prohibi nan pa genera ganashi via di muchanan of usando informacion personal den maneranan cu por causa daño na e muchanan sea fisicamente of mentalmente, Gobernador Gavin Newsom a bisa diahuebs.

“Nos ta tumando accion agresivo na California pa proteha e salud y bienestar di nos muchanan,” Newsom a bisa den un declaracion unda cu a anuncia cu el a firma e proposicion. El a nota tambe cu como un tata di 4 mucha, “mi ta familiar cu e problemanan real cu nos muchanan ta enfrenta online.”

E proposicion ta rekeri e companianan di tecnologia cu ta provee servicio atractivo na muchanan sigui un codigo di diseño apropia pa e edad di e muchanan, cu e meta di mantene muchanan ‘safe’. Companianan eventualmente lo mester entrega un “asesoramiento di impacto di proteccion di dato” na e estado su abogado general prome cu nan ofrece servicio nobo online, productonan of funcionnan cu ta atractivo pa muchanan.

Meta a bisa cu nan tin preocupacion pa cu algun di e provisionnan di e ley, sinembargo ta comparti e meta di mantene e muchanan safe online. “Nos ta kere cu hobennan y muchanan mester tin proteccion consitente den tur aplicacion y servicio online cu nan ta usa, cual ta e motibo dicon nos ta ofrece standardnan den e industria aki cu ta cla den e area aki,” e gigante den rednan social a bisa. El a yama e ley aki “un desaroyo importante den e direccion di establece e standardnan aki.”

E proposicion a ser crea similar na uno cu a ser presenta den Reino Uni. Den e aña desde cu e ley a drenta den vigor, algun di Merca su companianan di tecnologia mas valioso a “cuminsa cambia e diseño di nan producto den e miho interes di e muchanan,” Democratic Assemblymember Buffy Wicks a declara, ken ta co-autor di e ley aki.

“Awo, nos por sigura cu e mesun caso aki lo tuma luga pa e muchanan y hobennan di California, y nos ta spera cu esaki lo expande na hobennan den henter e pais,” Wicks a expresa.

E ley a enkontra oposicion di un coalicion, incluyendo e Entertainment Software Association, ken a bisa cu esaki ta inclui “standardnan cu ta dimas inclusivo y lo afecta mas sitionan web y plataforma di loke ta necesario.”

E ta e di dos proposicion grandi pa cu proteccionnan online firma pa Newsom e siman aki. E medida anterior ta rekeri companianan di rednan social provee detaye tocante con y ki ora nan ta kita contenido inadecua, incluyendo mensahenan di odio.

Un tercer proposicion a fracasa di pasa den e Senado e aña aki, E lo a prohibi companianan di rednan social adopta funcionnan cu nan sa por causa adiccion den e muchanan.

Sinembargo, Jim Steyer, CEO di Common Sense Media, un grupo cu ta boga pa muchanan, a bisa cu e proposicion cu Newsom a firma riba diahuebs tabata “necesario y ta un paso positivo den e direccion di para fuerte dilanti tecnologia grandi.”

E desafio di proteha e muchanan online ta algo cu a resona di manera personal cu Newsom su casa, Jennifer Siebel Newsom, y Wicks, kendenan ta ambos mama di muchanan chikito.

“Mi ta sumamente preocupa y cu hopi miedo di e efectonan cu adiccion na tecnologia y saturacion di tecnologia por tin of tin caba riba nos muchanan y nan salud mental,” Siebel Newsom a comenta den sosten na e proposicion, aunke el a admiti cu e “rednan social y internet ta un parti integro den e manera cu nos como un comunidad global ta conecta cu otro y ta comunica cu otro.”