Recientemente un informe nobo y importante ta subraya cu cambio di clima ta un riesgo existencial pa Aruba, y cu su economia, infrastructura critico, y salud publico tur ta enfrentando riesgonan severo. E estudio amplio di Stimson Center ta identifica un combinacion alarmante di un naturalesa cu ta bayendo atras, un presion social intenso riba comunidad, y un economia cu ta depende di mas riba turismo tradicional.

E informe, “CORVI: Midiendo Riesgonan Climatico Multidimensional na Aruba,” ta duna un evaluacion di henter e isla basa riba diferente factor di riesgo ambiental, social, y economico. E ta conclui cu subida di nivel di lama, olanan di calor y secura mas intenso, y erosion di costa ta menasando casi tur aspecto di bida na Aruba.

E estudio ta mustra e dependencia pisa di Aruba riba turismo como su vulnerabilidad economico mas grandi. E industria ta representa mas cu 70% di e economia di e isla y mas cu 85% di tur cupo di trabao. E modelo di turismo aki cu ta depende di nos naturalesa y cu ta concentra na costa ta laga e nucleo di e economia expone na un manera peligroso pa tormenta, inundacion, y erosion.

Ademas e estudio ta mustra cu nos naturalesa di cual e turismo di Aruba ta depende a bay hopi atras. E informe a duna un score di “riesgo halto” na e salud di e rifnan di coral existente y e cantidad di mondi di mangel. E ecosistemanan aki no ta djis un atraccion pa turista; nan ta e “liñanan di defensa” vital di Aruba contra tormenta, ola y inundacion. Mientras cu nan ta wordo daña pa desaroyo na costa, Aruba a bira mas vulnerabel pa daño di tormenta.

E informe ta destaca tambe riesgonan social y di salud urgente cu e comunidad Arubano ta enfrentando. E “densidad di poblacion” y “presion social” di e Aruba a ricibi un score di riesgo halto. E crecemento aki ta concentra den zonanan costero vulnerabel, poniendo presion riba servicionan publico manera tratamento di awa sushi y empeorando e “efecto di isla di calor urbano”. Aruba ya caba ta un di e paisnan mas cayente na mundo.

E calor aki ta un menasa directo pa salud publico, specialmente pa e adulto mayor y hende cu ta sufri di maleza cardiovascular.

E informe ta urgi gobierno y comercio pa tuma accion inmediato y integra. E ta haci un yamada na sector publico, sector priva, y sociedad civil pa traha hunto y inverti den restauracion di ecosistema, implementa un plan di desaroyo teritorial solido cu ta tene cuenta cu desaroyo social, y fortalece e economia door di adapta y fortifica resiliencia climatico di nos sector turistico y comercial.

E informe completo ta disponibel riba website di e Conseho Nacional di Resiliencia Climatico: https://ncrc-aruba.org/documents/20241103A/Stimson_Report_Aruba_10.29.25_Web.pdf