Wak bo af bon prome cu bo ta gewoon flush e awa di wc y lag’e bay. Aunke e por ta vies, af ta un bon thermometer of indicador pa bisa bo con bo curpa ta paden. Pero principalmente e por manda bo algun señal cu por yuda bo pa preveni cancer di tripa of di stoma tempran.

Bo af ta un refleho dicon bo ta hiba bo bida” , asina doctor di cas, Sharline Vis a bisa como prome conseho pa preveni cancer di tripa. Dr. Vis hunto cu promotor di salud di departamento di Salud Publico (DGZ), Jurette Croes a bin cu algun informacion y recomendacion pa bo tene cuenta cu esaki den cuadro di luna di conscientisacion pa preveni cancer. E biaha aki nan a enfoca riba cancer di tripa of di sistema digestivo cu ta e di cinco tipo di cancer mas comun na Aruba. For di 1999 te cu 2016 alrededor di 12 persona a fayece pa causa di e cancer di tripa riba nos isla.

Prevencion
E ta un cancer cu si bo ta descubri na tempo tin tratamento pe. Esaki si e cancer no a plama ainda, ya cu tin diferente fase di e cancer aki. E prome ta esun cu ainda e cancer no a pasa e musculo di e tripa. Si bo ta detecta na tempo y no a yega na e fase cu el a sali afo for di musculo di tripa, e ta wordo trata sin problema. Pero si e cancer aki ta asina avansa den e categoria di cuater y cu el a pasa e musculo di e tripa y bay afo y plama, e ta mas complica. E cancer aki ta mas frecuente den personanan di mas cu 55 aña di edad.

Pero pa preveni e cancer aki tur cos ta cuminsa cu wak bo af bon. “Hopi hende no kier bira y wak den wc y wak nan af. Nan tin teror di nan af. Of nan ta haya vies.”, e ta bisa. Pero no mester lubida cu af ta algo produci pa bo curpa.

Dr. Vis a bisa cu cancer di tripa ta e cancer di e dikke darm of tripa grandi. E ta e parti di e tripa unda nan ta saca e substancia di cuminda cu nos curpa mester. Nan por ta mineral, vitamina y tur loke ta nutritivo pa nos curpa. Loke ta resta den e dikke darm ta loke nos curpa no ta uza, manera fibranan y bacterianan. Esaki ta den e ultimo parti di e dikke darm.

Sintomanan
P’esey ora cu tin un cancer den e dikke darm, mester pensa kico por a pasa. El a splica cu hopi biaha loke ta pasa ta cu paden di e tripa ta haya cambionan cu por produci poliepen cu por duna un bashamento di sanger. Pues esaki ta sintomanan cu por duna un indicacion cu por tin algo cu a crece den e tripa cu eventualmente por ta cancer. E poliepen tin biaha por ta benigno, pero den transcurso di añanan nan por bira maligno .

Ta importante pa bo por detecta esaki na tempo. Ora cu tin un tumor cu ta crece paden di bo tripa den e ultimo parti di e dikke darm causa pa e poliepen, bo por haya sintoma manera obstruccion. Bo af no por pasa bon of normal manera semper. Ta bin cambionan den e af cu ta importante pa bo tene cuenta cu nan.

E cambio aki por ta den e forma di e af, ya cu e tin cu pasa dor di e obstruccion y ta dificil pa e sali pafo. Bo mester mira bon si e ta haya e forma di un potlood. Tambe bo por haya cambionan den structura no solamente e por ta duro sino cu bo por haya un tipo di diarea cu ta hole hopi stinki. Tambe bo por haya cu bo af tin sanger of slijm.

Esaki ta e sintoma cu bo ta wak mas tanto ora cu tin un tumor cu ta trece den e ultimo parti di e dikke darm cu ta e colon full na final di e anus. E ta encurasha pa esunnan cu ta wak e cambio aki den nan af pa no tin miedo pa bay nan dokter di cas, pasobra bo tin cu bay mesora pa atende cu e asunto aki. Asina bo ta evita cu eventualmente e desaroyo di e cancer no bira mas avansa.

Como dokter di cas, Dr. Vis ta haya cu mester preveni pa haya malesa. Actualmente na Aruba no tin programa di screening di forma structura pa preveni e tipo di cancer aki manera nos tin cu e campaña di mammogram cada 2 aña pa preveni e cancer na pecho.

Estilo di bida
Aunke ainda nan no sa net kico ta e causa di cancer di tripa, ya cu e por ta debi na varios factor. Pero si a wordo identifica algun factornan di riesgo pa desaroya e tipo di cancer di tripa.

Un factor por ta hereditario den famia, pero e ta algo poco comun. E tipo di cancer pa causa hereditario of den famia tin di haber cu bo estilo di bida, ya cu den famia nos ta hereda tipo di estilo di bida tambe. Estilo di bida kiermen e manera con bo ta biba: Cuanto bo ta move, kico bo ta come, si bo ta consumi alcohol regularmente y humamento di sigaria. Nan ta casi e mesun factornan pa desaroya tur tipo di cancer.

Un punto cu el a trece dilanti ta e comemento di carni cora, y tambe e productonan cu ta wordo produci di dje (hot dog) tin un conexion cu e cancer di tripa. Pa siman e ta recomenda maximo 500 gram di carni cora.

Importante ta pa bin cu un bon balans den bo alimentacion cu fruta y berdura y menos carni cora. E bon alimentacion aki ta wordo refleha tambe ora bo ta af. Ya cu bo ta af sin problema y no pida pida. Dr. Vis a bisa cu a base di un bon alimentacion bo por percura pa bay af bon. E ta atende cantidad di pashent cu nan af no ta bon of ‘cu nan ta descontento cu nan af’.

Tambe si e af ta draai riba awa di wc, e ta un bon af”, segun Dr. Vis. El a splica cu si e af ta draai ta pasobra bo ta comiendo hopi fibra y bo ta bebiendo likido suficiente, y esey ta bon.