(AP) – Camilo a gana su prome premio Latin Grammy aña pasa, y pronto lo por tin hopi mas den su man. E cantante Colombiano di e hitnan manera “Tutu” y “favorito” a ricibi e cantidad di nominacionnan mas grandi, cu 10 nominacion riba diamars cu entre otro cantica di aña pa “Vida de Rico,” y album di aña cu “Mis Manos.”

Maestro Dominicano Juan Luis Guerra ta den di dos luga cu 6 nominacion, y raper Spano C. Tangana a ricibi 5. Rapero Puerto Ricano Bad Bunny, ken a triunfa siman pasa na Billboard Latin Music Awards, a haya 4 nominacion riba diamars.

“Mi ta asina contento, mi ta hopi orguyoso, pero ami ta solamente e cara, e nominacionnan aki ta pa hopi hende cu a traha cu mi pa haci tur e produccionnan aki, y e album aki ‘Mis Manos,’” Camilo a conta The Associated Press durante un entrevista telefonico desde London, unda cu el a yega momentonan anterior di Barcelona, pa continua cu su tour Europeo.

“E ta yena mi persona di hopi orguyo cu un album cu nos a traha como famia cu hopi amor, poniendo na halto mi identidad como un cantante y escritor Colombiano,” ta asina reconoci. “Mi ta traha musica paso musica ta mi pasion, pero pa ricibi 10 nominacion, mi ta sinti cu mi ta den un nubia di felicidad.”

E Latin Grammy Awards lo bolbe bek, den su 22 aña, na e MGM Grand Garden Arena na Las Vegas despues di a keda organisa na Miami aña pasa sin audiencia pa cuasa di e pandemia. E gala lo ser televisa riba Univision riba dia 18 di november, pocodespues lo psa e “Premiere”, cual ta e evento unda cu mayoria di e premionan ta keda entrega.

Camilo ta competi dos biaha den cantica di aña y album di aña. E prome ta inclui tambe “Amen”, cual ta un colaboracion entre su persona, su casa Evaluna Montaner, su suegro Ricardo Montaner, y rumannan di su casa Mau y Ricky. Den e di dos, cual ta reconoce e autornan di e cantica, unda cu e ta aparece como co-autor di e cantica “Dios Asi Lo Quiso” cual ta canta pa Ricardo Montaner y Juan Luis Guerra.

“Vida de Rico” tambe a keda nomina pa miho cantica di genero pop y su album “Mis Manos” a keda nomina pa miho album di genero pop. Pero Camilo, ken su album a experimenta cu varios otro ritmo, a logra haya nominacion den otro genero tambe, maanera Bachata, Calypso, Cumbia y Perreo.

Guerra, un ganado di Latin Grammy 20 biaha caba, a ricibi e cantidad mas halto di nominacion e aña aki riba diamars. Ademas di cantica di aña, e ta competi pa album di aña, y miho album tradicional di genero pop cu “PRive,” miho cantica tropical cu “Pambiche de Novia,” miho areglo pa “Ojala que Llueva Cafe (Version Prive)” y miho video musical pa “Entre Mar y Palmeras.”