Ayera mainta durante un conferencia di prensa Gilliany Oduber, Embahadora di Salud di Pecho, hunto cu Nanine Ponson, Director di Fundacion ABO y Charlaine Huntington, Manager Marketing & Communications na HOH Aruba, a anuncia e inicio di e campaña Mira Nos pa conscientisacion di cancer di pecho.

Aña pasa na october 2024 Gialliany Oduber a ser diagnostica cu cancer di pecho. El a enfatisa cu na momento cu esaki a sucede, mesora el a sinti cu el a pasa pa un motibo, cu tin un proposito su tras, y e propsito tabata pa e halsa su voz y conscientisa comunidad riba e importancia di salud di pecho.

“E campaña Mira Nos ta un yamada directamente di bo pechonan pa bo mira nan, pa bo mishi cu nan, pa bo ta pendiente di nan pa asina bo tuma responsabilidad di bo mesun pechonan,” el a remarca.

E idea di e campaña a bin di parti di Oduber conhuntamente cu Fundacion ABO y diferente otro partner, entre otro HOH Aruba.

Oduber a indica cu ora algo malo pasa y e ta algo negativo, e ta sali den noticia y ta storianan cu semper ta ser comparti. Den su caso, el a enfatisa, e ta sinti cu ta su deber pa, ora cu algo cana netjes y cana bunita, tambe comparti e noticia y conta e storia.

“Si mi a ser diagnostica cu cancer di pecho aña pasa, si e tabata un proceso hopi dificil, hopi duro sin duda. Pero tambe e ta duna mi hopi satisfaccion y e ta haci mi hopi contento pa sa cu nos tin un proceso solido na Aruba,” Oduber a remarca.

El a conta cu desde e momento cu su mes a haci su chekeo propio pa asina haya sa cu e tin cancer, mesora e proceso a cuminsa y ora el a haci su mamogram y echo, den 24 ora ya Mamopolie a tuma contact cune y asina a cuminsa cu e proceso rapidamente.

“E proceso a cuminsa cana mesora cu hopi speed y e ta un orguyo inmenso pa sa cu na Aruba nos tin hospital cu tin proceso di kimoterapia y cu alabes ta opera. Nos tin ImSan cu no solamente ta haci operacion, pero alabes tambe duna e servicio di bestralling. Tin fundacionnan cu ta duna sosten na e pashentnan. Tin DVG cu a para tras di e campaña. Definitivamente nos a haya hopi sosten y cu e campaña nos kier logra algo bunita, nos kier inspira esnan bou di 45 pa haci nan chekeo propio,” el a enfatisa.

El a agrega cu adicionalmente nan ta bay lansa un ‘challeange’ cu lo carga e nomber “Feel your Titties Challenge” cual ta pidi e hende muhe directamente pa check su pechonan. E challenge aki lo ser carga door di WOW Aruba.

Nanine Ponson, Director di Fundacion ABO, di su banda a splica cu for di su inicio na 2012 Fundacion BOB Aruba e tempo ey, y desde october aña pasa como Fundacion ABO, su meta principal ta promove saludd publico cual nan ta haci door di facilita sondeonan den populacion pa deteccion trempan di cancer.

Pa medio di sondeonan aki, el a sigui splica, nan ta aumenta e probabilidad di deteccion trempan, tratamento efectivo y tambe posiblemente cura. Desde 2015 e programa di BOB ta activo cu su mamogram preventivo y desde april di e aña aki e fundacion a cuminsa tambe cu e programa pa cancer di boca di matriz cu pap test preventivo y e programa cu ta test pa deteccion di cancer di tripa.

“Cada bes cu mi scucha un persona ser diagnostica cu cancer e ta haci algo emocional. Mas ainda ora ta trata un persona cu bo conoce y cu no a yega e edad ainda di screening,” Ponson a indica.

El a splica cuna principio ora cu Oduber a presenta e idea nan no tabata sa precies con ta bay forma e campaña, pero si cu e lo ta algo grandi. Asina Oduber a forma un plan pa e campaña Mira Nos cu tin como meta principal promove salud di pecho pa medio di chekeo propio.

Ponson a remarca cu mirando cu cancer di pecho no ta discrimina a base di edad, Fundacion ABO a opta pa enfoca e campaña aki riba hende muhe mas hoben cu 45 aña di edad. Tambe pa empodera nan pa asina ora nan yega na beurt na BOB nan por haci nan mamogram.

“E meta ta conscientisacion. Esaki absolutamente Fundacion ABO no por haci’e su so pasobra despues di screening y den caso di iregularidad e trayecto ta continua na HOH of ImSan y Volksgezonfheid cu ta monitor e sondeo aki riba un escala nacional. E cadena di cuido aki no ta posibel sin conscientisacion, pueblo mester ta na altura di kico tin eyfo pa nan haci uso di dje,” el a enfatisa.

Tocante e challenge “Feel your Titties Challenge” Ponosn a splica cu e challenge aki nan kier motiva tur hende pa cera conoci cu nan curpa un poco mas di cerca. Alabes el a subraya cu nan ta recomenda tur hende muhe pa por lo menos 1 biaha pa luna haci chekeo propio pa no faya ningun iregularidad. Den caso cu nota algo tuma contacto cu dokter di cas, y si no nota nada y yega e edad di entre 45 y 65 aña, y tin mas cu dos aña sin haci mamografia preventivo, mester tuma contacto cu Fundacion ABO pa e programa di BOB.

Charlaine Huntington di HOH Aruba di su banda a splica cu e campaña Mira Nos nan ta enofca riba hende muhe di bou di 45 aña. El a remarca cu Fundacion ABO ta haciendo un tremendo trabou caba pa detecta na tempo unabes cu un hende muhe tin 45 aña bay ariba, pero tambe ta importante pa enfoca riba hende muhe di 45 aña bay abou.

Segun data di hospital na aña 2021 e hende muhe di mas hoben cu a ser diagnostica cu cancer di pecho tabatin 35 aña, den aña 2022 e pashent di cancer di pecho mas hoben tabatin 33 aña, den 2023 28 aña, den 2024 36 aña y te awe 1 di october 2025 e pashent di mas hoben tin 22 aña.

“Ora cu a haya e cifranan aki, mi a bisa wow, esaki ta e motibo pakico hospital tambe ta kere fuertemente den e campaña aki. El a reforsa tambe e motibo pakico nos ta para fuertemente su tras. E ekipo di Aruba t’ey pa guia e pashent for di comienso di su trayecto te na final,” el a indica.