Recientemente, autoridad di turismo di Aruba, A.T.A., a comparti un campaña nobo promocionando e producto turistico Aruba, mediante un video titula “When you love Aruba, it loves you back.” Sinembargo, e video a ricibi critica di ciudadanonan local.

Segun A.T.A. a splica mediante un comunicado di prensa, “e campaña di e aña aki ta refleha un cambio importante den e lenguahe y mentalidad, caminda ta posiciona Aruba no solamente como un destinacion pa bishita, pero como un hogar stima.”

“E aña aki ta marca un compromiso pa fortalece turismo responsabel, redefiniendo e relacion entre Aruba y su huesped. E isla ta encurasha un filosofia nobo di recuperacion mutuo y restauracion di Aruba, caminda e huesped mester tuma un rol mas activo den e proceso segun comportacion respetuoso y consciente cu un impacto minimo,” segun e comunicado.

“Nos no ta simplemente invita e huesped pa experencia Aruba, nos ta provee nan un bon bini na nos hogar,” tabata palabra di Ronella Croes, CEO di A.T.A. “E relacion mutuo di nos ta graba den e curason di e campaña “The Aruba Effect”, y den 2025, nos ta pone esaki den practica real.”

Segun A.T.A., “e campaña di aña 2025 ta esun di mas ambicioso te cu awor, cu a conta cu planificacion y produccion di cinco dia na trintidos lugar espectacular di Aruba. Basa riba autenticidad, e campaña ta inclui mas cu dos shen talento local, y un talento di voice-over local, alabes un melodia compone special cu ta contene zonidonan natural di e isla, pa crea un experencia auditivo y captivante di e beyesa y calidad di Aruba. E produccion tambe a inclui un desfile di carnaval grandi y colorido, cu ta refleha herencia cultural rico y bibo di Aruba. E produccion ta resalta e importancia di un turismo responsabel, mientras ta celebra e espirito y beyesa di nos isla.”

Ademas, a splica cu e strategia ta basa riba tres pilar:

  • Un movemento holistico pa turismo responsabel
  • Integracion di mensahe educativo y visual pa inspira comportacion respetuoso
  • Y un campaña dirigi na e huespednan cu ta fortifica e mensahe di recuperacion mutuo entre huespednan y e comunidad local, un mensahe cu ta reforsa mensahe via socionan local

“Mas cu simplemente un mensahe, e campaña ta un movemento basa riba balornan pa un proposito mas intencional. Ta invita huespednan pa pensa diferente encuanto nan rol den e experencia local, no solamente disfruta di paraiso, pero como cuidador di e isla,” segun e autoridad di turismo.

Critica
 Sinembargo, e bunita intencion tras di e campaña a ricibi critica di personanan influyente den comunidad local.

Periodista Arien Rasmijn a comenta riba rednan social cu a pesar cu e video di A.T.A. a pon’e sinti “hasta emocional”, toch el a genera “sentimentonan hopi mixto, entre otro cu rabia.”

Rasmijn a critica cu “un biaha mas e ta presenta nos hogar manera un tipo di wellness retreat pa otronan, siendo nos mesun hendenan di baina tin lugar, tempo, entrada of energia mes pa enjoy nan lugar, nan beachnan, nan mondi y barancanan…Nos hendenan no ta mas cu empleadonan den un Disneyland turistico for di unda nan no por ni sali pa tuma un break. Nos no ta mas cu e background extras, non-playable characters, den un season di White Lotus,” agregando cu localnan “tin cu lanta tur dia den un lugar cu nan ta reconose visualmente pero poco poco ta sinti menos manera NAN CAS.” Y esaki mientras ta spera cu nan lo desempeña nan rol den proyecta e imagen di “One Happy Island” pa Aruba pa e turistanan.

Rasmijn a haci un comparacion entre e imagen cu kier proyecta di Aruba, y e realidad cu poblacion local ta biba tur dia. “Ora mi tende e spot papia di ‘healing waters’, di biaha mi tin cu pensa riba e rapport di Carmabi cu tanto a purba di tapa y e awa di RWZI drentando lama na Eagle. Ora mi wak e hendenan den e spot asina [relaha] y contento, mi tin cu pensa riba e tantisimo casonan di suicidio y e overflow di hendenan cu [problema] di salud mental cu ainda no tin ayudo structural.”

Rasmijn a continua bisando cu “loke mi a wak den e spot den su esencia ta berdad, pero e esencia ey ta sigui disparciendo cu cada accion cu ta tuma pa construi y yena mas camber, laga caravana di ATV cu UTV keda pasa full trot den nos mondinan, keda deregula benta di real estate y tanto otro cos mas.”

Loke hopi otro usuario di rednan social a enfatisa, ta e desconexion entre loke e video di A.T.A. ta proyecta pa e bishitantenan y e realidad cu e habitantenan di nos isla ta biba tur dia.

Finalmente, Rasmijn a hala atencion riba e timing di e campaña nobo, “apenas poco dia despues cu leadership di ATA y sector hotelero mester a splica Parlamento con ta bay haci awo cu tin un guera di tarifa andando y un recesion pisa na caminda cual lo afecta Aruba su turismo. As far as I know te awo no tin transparencia riba e plannan di e aerolineanan cu supuestamente lo a wordo delinea caba. Pero lo bay purba compensa e caida di turistanan Mericano cu mercadeo na turistanan Latino y Europeo, cual te dia di awe nunca a duna resultado consistente.”

Sinembargo, e parti mas importante di e critica ta dirigi na e asignacion di responsabilidad pa cuida nos isla, cu den e campaña di A.T.A. ta parce di kier asigna e responsabilidad aki no na autoridadnan local eligi pa maneha y goberna nos pais, sino na e bishitantenan. E idea cu e turistanan cu ta bishita nos isla tin cu cuida e isla ta uno cu no ta asigna e responsabilidadnan adecuadamente.

Por ehemplo, e falta di limite pa cierto actividad permiti na Aruba ta causa destruccion na e flora, fauna y infrastructura di nos naturalesa. Esaki ta un responsabilidad di autoridadnan pa delinea y aplica reglanan estricto y cu ta conta pa tur hende. Algo cu ta keda causa molester cerca hopi den comunidad ta e vehiculonan ATV/UTV, cu ta core cu impunidad rond henter e isla, causando daño na naturalesa y molester di stof y zonido pa e comunidad. Maske a bin cu un maneho pa esaki, e hecho cu ta continua promoviendo tour cu e vehiculonan aki pa turista ta mustra un desconexion cu e deseonan di mayoria di e poblacion local pa tene mas cuenta cu medio ambiente y calidad di bida di e residentenan.

Tambe por considera e decision di gabinete anterior di laga e turistanan paga un suma pa renobacion di RWZI, e planta di purificacion di awa. Mientras cu ta berdad cu e turistanan ta haci uso di e planta di purificacion di awa durante nan estadia, e responsabilidad ta keda di e hotel y cas di huur cu ta hospeda nan pa carga e responsabilidad structural pa esaki, y atrobe, di autoridadnan local pa inclui e mantencion, mehoracion y adaptacion di e instalacionnan di RWZI den nan maneho y planificacion.

Na final, e falta di un maneho cu ta resulta concretamente den un diversificacion di economia di Aruba, cu ta un fracaso structural di gobiernonan consecutivo di diferente color, ta nifica cu Aruba ta keda depende riba turismo, un industria fragil y vulnerable pa shocknan externo. Alabes e ta obliga Aruba pa keda comparti tur recurso cu bishitante, y na momento cu e recursonan ta bira limita – espacio, awa, aire, etc. – ta crea friccion y hostilidad den e comunidad local.

Ta keda na autoridadnan pa responde adecuadamente na e preocupacion y malcontento di e ciudadanonan, y pa e ciudadanonan, e responsabilidad pa vota pa esnan cu representa nos interesnan debidamente.