Despues di un descanso di 1 siman diabierna ultimo Campeonato Balashi a continua den Balashi Beer Garden cu e confrontacion nan:

  • Trappers DT – Old Parr DT
  • Ottley’s Strikers DT – Eagles DT

Den un wega hopi preta nos por a mira Old Parr DT recupera bon despues di tabata perdi 7 – 3 pa bin gana Trappers DT cu e score di 13 – 12. Domino en general tabata contento di por a mira Michael Kock di Trappers DT hunto cu su team despues di a duna tur hende un spanto. Nos ta desea Michael hopi salud y bay poco poco.

E otro wega di diabierna tabata un wega sin ningun sorpresa. Ottley’s Strikers DT a bin pa haci locual nan mester a haci y a gana Eagles DT cu e score di 14 pa 11. Cu e score aki Ottley’s Strikers DT ta cu un pia den Play-off 2019 y asina haci e reto pa Gold Stone Dewars DT mas dificil pa participa de Play-off.

E wega nan di diadomingo a tuma luga na Sport Boys Club. Den e wega Sport Boys DT – Gold Stone Dewars DT no tabata tin sorpresa. Gold Stone Dewars DT a gana e wega cu e score di 14 pa 11. E score aki no ta suficiente pa Gold Stone Dewars DT pone Ottley’s Strikers DT tembla pa e spot den Play-off 2019.

Den e wega number 2 di diadomingo, Noord Stars “Pizza Hut” DT a gana X-treme DT 13 – 12. X-treme DT a rally bon pa yega cerca; X-treme DT a logra gana 5 mesa den tanda 5 pa yega 12. Pa Noord Stars “Pizza Hut” DT Alex Kelly a bati di mil punto cu 3 wega gana den 3 oportunidad.

E proximo wega nan lo ta september 20 na Ottley’s Place y September 22 na RiverPlate:

  • Eagles DT – Old Parr DT
  • X-treme DT – Ottley’s Strikers DT
  • Sport Boys DT – Trappers DT
  • Gold Stone Dewars DT – Noord Stars “Pizza Hut” DT

Cu 1 wega mas den round 2 nos por bisa cu esunnan cu lo participa pa Play-off 2019 ta casi determina caba. Theoreticamente Gold Stone Dewars DT tin un chance chiquito ainda. Ban wak. E ekipo nan ta spera tur nan fanatico y sostenedo nan lo ta presente.