ORANJESTAD – Siman pasa tabata tin e gran apertura bunita y colorido apertura di campeonato Heineken fast pitch verld di Kudawecha, dedica na Jacobo Jansen y Gilbert Nando Maduro.

Un anochi bunita por cierto unda ekiponan a bini hunto pa brinda un bunita desfile. Campeonato 2019 a wordo dedica na dos baluarte Jacobo Jansen y Gilbert Nando Maduro. Ambos atletanan cu un trayectorio impresionante. MC Sandra Croes a habri e anochi yamando bon bini na tur invitadonan. Presidente di ASU Gerald Franca a hiba su discurso representando Minister di Deporte mientras Tito de Cuba di Stichting Subsidie Commissie a entrega e premio na e hobencita kende a sali Madrina di aña di ASB 2019.

Presidente Endy Croes a hiba un speech gradiciendo e baluartenan y nan familiarnan kendenan aña aden y aña afo a sostene e atletanan unda merecidamente campeonato 2019 ta wordo dedica na nan honor. Alabes a gradici tur presente pidiendo atletanan pa competi duro den tereno pero corda semper pafo di tereno deporte ta e vehiculo pa crea Amistad, networking y sigur un miho conciudadano pa mañan. Despues cu a homenahe tanto Jacobo Jansen y Gilbert. Esaki ta segun e fuente 297 Sports.

Nando Maduro a entrega nan un plakkaat bunita como reconocemento a bay over na yama dos atleta jong padilanti y a laga nan lesa e credo di softball. “Mi ta kere den Dios, Mi ta stima mi Patria y lo respeta su leinan, mi lo hunga fair y lo haci mi maximo esfuerso pa gana, Pero gana of perde mi lo saluda mi oponente deportivamente!!” Despues di e credo a yama dos umpire pa pasa e proceso di huramentacion publicamente. Finalmente a lansa e prome bala unda Jacobo Jansen a fungi como pitcher, Gilbert Nando Maduro como batiado, Muelens como umpire y KJair Thompson como catcher. Despues di e bunita y colorido programa di apertura Royal Power Tat Fat a hunga contra Jay’s Tire Shop esta Campeon vs Sub Campeon 2018 a topa otro den e prome clash. Resultado lo continua den otro relato. Pabien Aruba Softball Bond, Pabien atletanan, Pabien deporte di softball y danki na nos baluartenan Jacobo Jansen y Nando Maduro pa nan gran aporte na nos deporte.