(ScienceDaily)—Agregando un par paso den bo rutina diario por yuda atrasa e progreso di malesa di Alzheimer, specialmente entre esnan cu ta mas vulnerabel, segun investigacion nobo. Den un estudio publica den Nature Medicine, cientificonan di Mass General Brigham a descifra cu mas actividad fisico tin corelacion cu un caida cognitivo mas lento den adultonan mayor cu tin un nivel mas halto di amyloid-beta, un proteina cu tin un relacion fuerte cu Alzheimer.

En averahe, personanan cu tabata cana entre 3.000 y 5.000 paso pa dia a experencia casi tres aña di retraso den e caida cognitivo. Esnan cu tabata cana entre 5.000 y 7.500 paso pa dia a mira cu e retraso a prolonga te casi siete aña. Na otro banda, participantenan cu tabata mas inactivo a mustra un acumulacion mas rapido di proteina tau den cerebro, algo cu ta relaciona cu e progreso di Alzheimer, y un caida mas rapido den habilidadnan di pensa y funcion diario.

“Esaki ta duna claridad riba kico ta causa cu algun hende riba e trayectorio di Alzheimer no ta bay atras mesun rapido cu otro,” e autor principal di e estudio, Dr. Jasmeer Chhatwal a bisa, ken ta di e Departamento di Neurologia di Mass General Brigham. “Factornan di estilo di bida ta parce di tin un impacto den e etapa mas tempran di Alzheimer, sugeriendo cu cambio di estilo di bida por atrasa aparicion di sintomanan cognitivo si nos actua tempran.”

Estudio di largo plaso riba actividad y cambio den cerebro

Investigadornan a analisa 296 individuo di entre 50 y 90 aña cu no tabatin deterioracion cognitivo na comienso di e Harvard Aging Brain Study. Participantenan a usa podometronan na cintura pa midi e actividad fisico y a haya PET scan pa midi placa di amyloid-beta y cadenanan di proteina tau den cerebro. Nan a completa evaluacionnan cognitivo anual durante un periodo di dos te 14 aña (promedio=9,3 aña), y un subgrupo a haya scan adicional pa monitoria cambio di tau cu tempo.

E resultadonan a mustra cu participantenan cu nivelnan eleva di amyloid-beta cu tabata cana mas pa dia a experencia un deterioro cognitivo mas lento y un acumulacion mas lento di e proteina tau. Modelonan estadistico a indica cu e beneficio principal di actividad fisico ta bin di su relacion cu un acumulacion mas lento di tau. Entre participantenan cu nivelnan abao di amyloid-beta, no tabatin evidencia di deterioro cognitivo ni di aumento di tau, y tampoco un corelacion significativo cu nivel di actividad.

Construyendo resistencia cognitivo via movemento

“Nos ta hopi contento cu e datonan di e Harvard Aging Brain Study a yuda e tereno di ciencia miho compronde e importancia di actividad fisico pa mantene salud di cerebro,” e co-autor Dr. Reisa Sperling, a bisa, ken ta un neurologo na Mass General Brigham y co-investigador principal di e estudio. “E descubrimentonan aki ta mustra cu ta posible pa construi resistencia cognitivo y resistencia contra patologia di tau den contexto di Alzheimer preclinico. Esaki ta specialmente stimulante pa nos meta final di preveni demencia di Alzheimer y pa reduci demencia causa pa multiple factor.”

E equipo ta plania pa investiga mas riba cua tipo di actividad fisico ta mas beneficioso, incluyendo con intensidad y patronchinan di ehercicio a largo plazo por influencia salud di cerebro. Nan tambe kier descifra e mecanismo biologico cu ta conecta movemento fisico, acumulacion di tau, y funcion cognitivo. E investigadornan ta kere cu e comprensionnan aki lo por guia futuro ensayonan clinico pa proba si intervencion basa riba ehercicio por atrasa deterioro cognitivo den adultonan mayor, specialmente esnan cu tin un riesgo mas halto pa desaroya Alzheimer.