Canciyer Austriaco, Sebastian Kurz a ofrece su ‘sosten completo’ ayera na e minister di Husticia nobo di e pais, en bista di odio online pa motibo di su origen Bosnio.

Alma Zadic ta un di e cuatro ministernan di partido Berde den e gabinete conservador nobo di Kurz, cual a huramenta diamars. E ta e prome Austriaco di background inmigrante pa join e gobierno.

Zadic, kende su famia a huy di e conflicto na Bosnia ora e tabatin 10 aña di edad, recientemente a enfrenta un fluho enorme di odio online enfoca riba su origen. Medionan di comunicacion Austriaco a reporta cu a otorga proteccion di polis henter dia y anochi na su persona.

Kurz a skirbi ayera riba Twitter cu ‘odio online ta un fenomeno repugnante di nos tempo. E sorto di cos aki no tin luga akinan!’

El a agrega cu su gobierno ‘lo actua cu resolucion contra odio riba internet’, sin importa su fuente, y a agrega: “Alma Zadic y tur otronan afecta pa esaki tin mi sosten completo!”

Minister di Integracion, Susanne Raab a bisa cu ‘odio riba internet y en particular odio contra hendenan muhe cu ta bon integra na Austria y ta traha pa un bida armonioso hunto, no tin luga”, segun Agencia di Prensa Austria a reporta.

LEAVE A REPLY

Please enter your comment!
Please enter your name here