Diamars madruga mesora a dirigi a drenta informe di un candela feroz na muebleria Bonita Upholstery And Matrass N.V. Hotel Used Furniture Store riba Caya G.F. “Betico” Croes. Mesora a dirigi tanto polis como bomberonan na e sitio.
Na yegada di e patruya a nota un candela grandi na e lugar y bisiñanan tabata papia di un explosion fuerte sigui pa e candela feroz. Polis a cuminsa evacua e habitantenan cercano como tambe localisa e doñonan di negoshinan den cercania. E doñonan di e negoshi mes no tabata localisable ya cu a parce cu nan telefon tabata paga. Na yegada di varios unidad di bombero nan a cuminsa combati e candela cu tabata concentra na e parti patras di e negoshi y un cas su tras.
Bomberonan a lucha fuertemente contra e candela feroz aki y a dura basta prome cu por a domina e candela. A hasta pidi pa e “Ladderwagen” di bombero presenta pero a tarda un poco pa e drenta den funcion pa su uso, mientras e candela ta sigui. Na e sitio dos persona lo a inhala mucho huma y mester a ser atendi pa e personal di ambulance na e sitio mes.
Te den oranan di mainta a sigui combati e candela.
