Dialuna ultimo, Candelario Ambrosio ‘Booshi’ Wever a bay Ministerio Publico pa entrega un denuncia cu tin di haber cu presunto iregularidad di parti di minister Otmar Oduber den proyecto di incinerator na dump di Parkietenbos.
Wever a splica cu manera tur hende sa, desde comienso di aña aki partido UPP a haci un peticion na Oduber pa entrega nan e copia di documentonan di onderhandse aanbesteding di incinerator chikito y nan a bay pa un procedura di LAR cu despues nan a haya e documento.
Di mesun manera, despues cu nan a haya tempo pa studia y analisa locual nan a sospecha for di comienso, esta cu tabatin un abuso di poder. Pero tambe un cambio di cifranan, cifranan cu no ta cuadra precisamente cu e placa cu ta disponibel, aumento di prijs pa haya casi tur 1.8 miyon florin y esey ta cambia e situacion cu ta bisa kico mester wordo haci, kico ta ofrece pa e solucion di kimamento di desecho medico.
Tocante esaki, Wever a comenta cu diripiente otro compania a sali miho y ta cambia e procedura, ta split e destaho caminda den principio, nan ta papia di insinerator chikito, pero tambe e operacion di dje. Nan ta pone un parti di incinerator cu DOW ta cumpra y e otro parti Serlimar mester cumpra, pa motibo cu si nan a pone hunto e compania cu ta sponsor – segun Wever mes a bisa – e amigonan di Oduber lo a sali hopi mas caro.
“Eynan bo ta ripara claramente cu minister a haci mal uzo di su posicion como mandatario pa privilegia un compania”, Wever a expresa.
Wever a sigura cu esaki ta bay contra ley y pa e motibo aki, el a entrega keho, na unda ta spera cu Ministerio Publico lo haci su trabou pa mustra cu e tipo di cosnan aki no ta integro. Tambe ta spera cu Bureau Integriteit Aruba, en bes di skirbi cosnan riba Facebook manera el a declara, tin cu wak e tipo di cosnan aki, ‘cu realmente no por’.
Ademas, el a sigura cu DOW tambe tin algo straño cu ta sosode, manera por ehempel, DOW ta descualifica Atco cu Ecotech pa motibo cu aparentemente esun cu a bay entrega e papel na Camara di Comercio no ta esun autorisa, pero e compania cu a haya e proyecto aki ni a yega di firma.
