Ayera, Candelario ‘Booshi’ Wever a ofrece declaracionnan pa e medionan local dilanti di e dump na Parkitienbos, tocante e situacion di maneho di sushi na e momentonan aki.

Wever a splica cu desde dia cu el a bay haci un bishita na e planta di Ecogas, e tabatin hopi preocupacion pa e cifranan cu el a haya, y te dia di awe el a expresa cu no ta existi cifra pa hustifica un ‘Waste-to-Energy’ por ehempel, pa motibo cu na final, e ciudadanonan lo mester paga pa un aparato di mas di 300 miyon di dollar cu, manera el a bisa, ‘gobierno no tin hustificacion pa haci un inversion asina grandi’.

Wever a expresa cu esaki ta algo hopi preocupante, y tin hopi incertidumbre den esaki pa motibo cu gobierno a haci un inversion pa un edificio na Pos Chikito, y te ainda nada a wordo haci.

Tocante su bishita pa e planta Ecogas, el a bisa cu e cantidad di desperdicio cu nan ta ricibi ta menos den comparacion cu e cifranan cu den tur tempo a wordo uza. Esey ta nifica cu ‘si e pais mester un Waste-to-Energy di 6 megawatt, den un futuro mester importa desperdicionan di afo’, el a anuncia.

Di su banda, Wever a manifesta cu tin hopi expertonan di area ambiental rond di minister cu no ta adverti e pais riba e problema aki. Asina mes el a bisa cu durante su bishita pa Ecogas, Serlimar y Jhonsons, tambe el a kere cu por haya mas trankilidad pero no, e preocupacion a bira pio.

Wever a haya oportunidad pa haci un inspeccion riba cierto documentonan cu minister di Infrastructura, Otmar Oduber a permiti pa e haci, y asina por bisa comunidad e berdad. Ademas, Wever a informa cu e lo lanta un caso sumario pa por haya e documentonan, y pa comunidad mira kico a sosode cu e incinerator chikito, cu segun Wever a splica, ‘minister Oduber a privilegia cierto hende cerca di dje’.

Di loke ta trata e edificio di Serlimar na Pos Chikito, el a duna di conoce cu no ta funcionando ainda, sino te dia 15 di juni ta parce cu lo cuminsa traha. Di e parti ey, el a anuncia cu gobierno a haci un contract cu ta dura 3 aña, y aki 2 aña nan no sa si e inversion grandi aki no lo t’ey mas.

Tambe el a bisa cu gobierno kier trece un ‘Waste-to-Energy’ no ta nifica esey, ta nifica un ‘Waste Of Energy’ of ‘Waste of Money’, pa motibo cu na tur parti di mundo e tipo di instalacion aki ta wordo cera, of nan ta drey cu subsidio di gobierno, y sin subsidio nan no ta funciona.

Solucion

Wever a manifesta cu e solucion pa e problema aki nan tabatin paden di Parkietenbos cu a wordo desmantela, esun di Bouldin & Lawson LLC, cu tecnicamente a funciona, pero pa via di falta di ponemento di diesel of bentamento di crank shaft den e sistema, el a daña. Di mesun manera, el a expresa cu ta existi un reporte traha recientemente, cu ta bisa cu un inversion di 3.1 miyon di Florin lo pone up-and- running, esey tabata un patrimonio di pueblo cu a ser paga pa nan mes, segun Wever a sigura.

Segun Wever ta existi di 8 pa 9 caso pa asunto di Bouldin & Lawson LLC, y el ultimo tabata di februari di 2016, unda tabata papia palabranan cla y tabata bisa cu tabatin un boycott cu na e momentonan aki ta sigui, el a finalisa.