Diadomingo awo, pa 7or di anochi, ta bay tuma lugar e certamen di Miss Aruba 2025. Cuatro candidata ta bay competi pa e corona pa representa nos pais como un reina di beyesa riba plataforma local y internacional. Bon Dia Aruba a combersa cu Sammie van Pinxteren, un di e candidatanan den e certamen, kende a conta nos tocante su inspiracion, su pasion, y su determinacion pa logra tur su metanan.

Sammie, 23, a nace y lanta na Aruba, y e ta un persona hopi positivo y yen di bida y alegria. El a conta cu e ta determina pa biba bida intencionalmente y haci cosnan pafo di su zona di comfort. Su decision pa participa den Miss Aruba tabata motiva pa su deseo di comparti su storia y trece cambio na Aruba. Despues di a bay studia na Hulanda, el a haya falta di Aruba, di su hendenan, y a dicidi di bin back na su isla y traha pa yuda pueblo di Aruba bay dilanti.

Sammie tin hopi aña den modelahe, y el a conta cu tur cos a cuminsa tempo cu e tabatin 7 aña di edad y a bay den un crucero. “Tabatin yen fotografo rond di e crucero, y un homber a bisa mi ‘bay haci modelahe’. Mi tabata hopi chikito ainda, mi a djis harie. Pero un cos a hiba na otro, y toch mi a bay traha cu [diseñador] Ronchi [de Cuba], mi a bay Art Fashion, mi a haci yen modelahe, tambe den America. Y e ta un pasion di mi. Ora mi a bay Hulanda, mi a manera lag’e bay, pero ora mi a bin back Aruba, toch mi a haya falta di dje y kier a continua.” Sammie ta trece un otro perspectiva mas creativo den su modelahe, unda e ta pone su personalidad positivo y unico den dje.

Actualmente, Sammie ta traha den marketing, unda cu su personalidad autentico e ta trece un otro luz na su trabao. “Mi kier mustra cu bo por ta autentico, y bo no mester semper haci kico tur hende ta haci. Sea bo mes, haci diferente y sinti miho.”

Pero no semper e tabata asina positivo y determina. Sammie a conta cu tempo di pandemia, el a bira seriamente malo y mester a keda hospitalisa. Despues di e experiencia aki, el a haya un aprecio nobo pa su bida. “Mi ta sinti cu mi ta aprecia cos mas. Mi a realisa cu no ta semper bo ta haya un ‘second chance’… Djis sa cu bida por caba den un momento, pasobra esey mi a sinti den e momento ey.” Cu su storia, e kier yuda hende cu salud mental y fisico, cual ta vincula na e Meta di Desaroyo Sostenible (SDG) number 3. “Toch bo ta wak hopi hende rond di Aruba cu ta eigenlijk luchando den silencio. Mi lo kier yuda hende pa sinti nan miho, saludable. Specialmente despues di tempo di corona, hendenan a bira mas cera, nan no kier papia. Mi kier yuda nan pa papia, pasobra e ta sinti miho.”
El a bisa cu pa un tempo e mes no kier a papia di su experiencia, “pero toch, di algun manera, mi a scoge pa busca ayudo, y mi a hacie.” Y el a realisa cu mester a papia di dje, y despues di hacie, el a bira hopi mas comfortable y abierto pa conta su storia. “Awo mi ta echt BIBA. Mi ta sigura cu tur dia ta yen. Papia cu hende [mas profundamente]. E ta yena mi curason.”

Tocante kico ta su hobbies y su pasion, Sammie a conta cu e ta echt gusta bay den naturalesa, hike, cana cu su cacho, y bay beach. “Un cos cu mi stima mas cu tur ta cambia cos den mi cas, dus bay tur sorto di tienda, y pone vaas nobo, flor nobo, cosnan nobo, djis pa pop bida den cas, y mi ta stima e sentimento ey hopi.”

Manera menciona, Sammie a dicidi di participa den Miss Aruba pa amplia su plataforma y yega na mas hende. El a conta cu si e gana, e kier bay cerca den comunidad y yuda mas hende cu ta posible. “Mi kier echt bay purba bay mas personal, y echt pone tur cos un banda cu mi tin den mi bida awo, y pone esaki como prioridad.” Pa Sammie, e no kier ta “djis un otro reina” cu ta haci “un tiki servicio comunitario aki aya.” E kier yuda elimina e taboo cu ta stroba hende di papia y busca ayudo pa nan problemanan. El a bisa cu si e gana Miss Aruba, e ta bay dedica 100 porciento na Miss Aruba y no ta bay haci nada otro e aña di su reinado. “Nan lo tin un bon reina si nan scoge mi. Mi conoce mi mes, y mi ta bay echt 110 porciento, full speed.”

Tocante e certamen mes, Sammie a conta cu ta bay tin un show “completamente diferente.”
“E aña aki tin solamente cuater [candidata]. Pa e show bira full, e ta bay ta un show completamente diferente.”

Como participante den certamen Miss Aruba, tin hopi mucha muhe cu lo mira Sammie y inspira nan mes pa bay den modelahe, beyesa, y mas aleu. Sammie ta bisa na e muchanan aki: “Biba, esey ta sigur. Biba y haci lo miho di bo bida. Y si bo ta sinti bo mes cu bo no ta sinti cu bo kier haci esey, busca ayudo. Hasta si ta un mensahe na ami, un hende di e organisacion, of cualkier hende rond di bo, djis un hint cu algo ta pasando. Sa cu e porta ta habri pa un bon combersacion y pa ayudo.”