Cantante Pink ta ofrece di paga boet duna na ekipo di handball Noruego

(AP) – Un di Merca su cantantenan mas iconico Pink a ofrece di paga un boet cu a ser duna na un ekipo di ‘beach handball’ di Noruega, pa motibo cu nan a bisti short na luga di e parti abao di bikini cu ta rekeri.

Pink a publica cu e tabata “hopi orguyoso” di e ekipo, pa e protesta contra di e reglanan cu ta preveni nan persona di bisti short manera e hungadonan masculino tin mag di haci.

Den un tweet publica riba e red social Twitter, Pink a publica “The European Handball Federation ta esun cu mester ricibi un boet pa e sexismo cu nan reglanan ta implementando. Hopi bon haci, muchanan.” Pink a bisa “mi lo ta felis di paga boso boet pa boso. Sigui cu e bon trabao cu boso ta haciendo.”

Na e European Beach Handball Championships na Bulgaria siman pasa, Noruega su ekipo femenino a ser duna un boet di 1,500 euro pa loke e federacion Europeo a yama vestuario inapropia y “kibramento di reglanan y regulacion di vestuario.” E reglanan ta stipula cu e muhenan mester bisti e parti abao di un bikini, mientras cu e ekiponan masculino tin mag di bisti short.

E Norwegian Handball Federation no a bay den contra di e decision aki, cual a ser mira como inhusto pa e ekipo Noruego, y hopi otro persona, y a te hasta anuncia cu nan tabata cla pa paga e boet aki.

E European Handball Federation a presta atencion na tur e criticnanan cu e incidente a causa, y trece dilanti den medio di communicacion y rednan social, y a bisa riba dialuna cu nan lo duna e cantidad paga pa e Norwegian Handball Federation den donacion na “un fundacion grandi di deporte internacional cu ta apoya igualdad den deporte pa muhenan y mucha muhenan.”

“Nos ta hopi pendiente di e atencion cu e topico aki a ricibi den e dianan aki, y mientras cu e cambionan no por tuma luga di un dia pa otro, nos ta completamente comprometi pa haci cu algo bon sali for di e situacion aki inmediatamente, cual ta e motibo dicon e European Handball Federation a dicidi di tuma e pago di e boet aki como un paso den un miho direccion, y duna esaki den donacion a un bon causa, cual ta di promove igualdad den deporte” President di e European Handball Federation Michael Wiederer a bisa den un declaracion.

Wiederer a bisa cu handball ya caba ta mas avansa cu algun otro deporte den algun aspecto, manera e igualdad duna na e competencianan masculino y femenino. El a bisa cu un igualdad manera esun den Handball a ser logra hopi mas trempan cu por ehempel den futbol.

E muhenan di e ekipo Noruego a publica un fotografia di nan persona bistiendo short riba e red social Instagram y a comenta na nan siguidonan “Hopi danki pa tur e apoyo cu boso ta brindando nos. Nos ta aprecia esaki hopi y tur e amor cu nos a ricibi di boso.”