(AP) – Tasa di accident y morto entre chauffeurnan menor di 21 aña di edad a disminui drasticamente na Merca durante ultimo 20 aña, segun un rapport nobo, mientras cu a nota cu chauffeurnan hoben ta e grupo cu mas riesgo riba caya te ainda.
Usando data di aña 2002 pa 2021, un grupo di experto den seguridad riba caretera den e rapport a publica riba diaranson cu accidentnan fatal cu chauffeurnan hoben involucra a disminui cu 38 porciento, mientras e fayecimento di hobennan a disminui cu 45 porciento. Pa chauffeurnan di 21 aña y mas, e accidentnan fatal a aumenta cu 8 porciento y mortonan a aumenta cu 11 porciento.
E rapport di Governors Highway Safety Association a admiti cu e hobennan te stuur mucho menos compara cu 20 aña atras, sinembargo ta enfatisa tambe varios otro causa tras di e mehoracion aki, mientras tambe a provee recomendacion pa sigui riba e bon caminda.
Programa di estado cu ta duna privilegio pa stuur den fase tabata den prome luga riba e lista. E programanan aki, asina yama Graduated Drivers License Laws, hopi biaha ta restringi of prohibi cierto actividadnan manera stuur anochi of cu demas personanan den auto pa hobennan. GHSA ta sugeri fortalece e programanan aki y te hasta expande esaki pa cubri chauffeurnan di 18 pa 20 aña tambe, di mesun manera cu Maryland y New Jersey ta haci.
Otro recomendacionnan ta inclui fortalece e participacion di adultonan of mayornan den nan yiu su educacion pa stuur, mas programa di educacion entre hobennan y haci training accesibel pa tur hende. “Chauffeurnan hoben ta e grupo mas riesgoso riba caya, y e motibonan ta hopi simpel; falta di madurez y experiencia,” Pam Shadel Fischer, autor di e reportahe a comenta. “Varios hobennan simplemente no tin e experiencia pa reconoce riesgo y tuma e accion apropia pa preveni un accident.”
