E cantidad di accidente serio y fatal riba cayanan di Aruba ta pone seguridad den trafico un biaha mas den centro di atencion. Den ultimo dianan, dos persona a perde nan bida y varios otro a resulta herida. Cu esaki, cantidad di morto den trafico na 2026 a yega na 12, den un aña cu ya ta registra mas accidente compara cu 2025.

E caso fatal mas reciente a tuma luga diamars marduga riba Avenida Nelson Oduber. Pa alrededor di 1:38 di marduga, autoridadnan a ser alerta di un accidente cu un Hyundai shinishi. Segun informacion preliminar, e vehiculo a sali for di caminda, pero e motibo ainda ta bao investigacion.

Den e auto tabatin dos homber cu a resulta gravemente herida. Un di nan no tabata reacciona na momento cu polis a yega. Personal di ambulance a brinda asistencia medico, pero no tabata posibel pa salba bida di e ocupante. Dokter forensico a constata morto di e turista Mericano Dwann Kaleid Gatewood, di 50 aña. E chauffeur di e vehiculo a ser transporta cu urgencia pa hospital den condicion critico.

E morto aki a bira e di 12 victima fatal den trafico na Aruba durante 2026. Apenas dos dia prome, Aruba a registra su di 11 morto den trafico, den un accidente na Westpunt cu a cobra bida di un hoben di 17 aña.

E accidente na Westpunt a tuma lugar poco despues di mey anochi di diasabra pa diadomingo. Segun informacion di Cuerpo Policial Aruba, e hoben tabata riba un brommer ora cu, pa circunstancianan cu no ta conoci ainda, el a sali for di caminda y dal contra piedranan canto di caminda. Personal medico no por a salba su bida y dokter forensico a constata su morto na e sitio. Specialistanan di trafico y polis tecnico a inicia investigacion pa determina exactamente kico a pasa.

E dos casonan fatal den un periodo asina cortico ta forma parti di un cuadro mas amplio di accidentenan cu a ser reporta den ultimo dianan. Dialuna anochi, por ehempel, un peaton di 63 aña a resulta seriamente herida despues cu un vehiculo a dal e ora cu e tabata crusando caminda principal di Pos Chikito. E victima a ser transporta cu urgencia pa hospital, mientras cu autoridadnan a cera parti di caminda pa permiti investigacion na e sitio.

Mesun dia, tres vehiculo tabata envolvi den un accidente riba caminda entre Sero Biento y Hooiberg. E impacto a causa daño considerable na e vehiculonan y por lo menos un persona a resulta herida. Den dianan anterior tambe a ser reporta diferente accidente na Kamay, Cura Cabay, De La Sallestraat, Palm Beach, Paradera, Santa Cruz y otro parti di isla, cu algun di nan a resulta den personanan herida.

E cantidad total di accidente registra durante 2026 ta mustra cu seguridad den trafico na Aruba ta keda un punto di preocupacion. Cifranan di ForenSys publica anteriormente e aña aki ta mustra cu durante prome kwartaal di 2026 a registra 2.676 accidente. Den e mesun tres lunanan di 2025, e cifra tabata 2.310. Esaki ta un aumento di 366 accidente den un aña.

Ya durante prome siman di januari tabatin señal di un aumento. Den prome siman di 2026 a registra 197 accidente, compara cu 129 durante e mesun periodo un aña prome. E cifranan no ta nifica cu tur e accidentenan tabata grave, ya cu gran parti di incidente den trafico ta limita na daño material. Sinembargo, nan ta mustra e frecuencia cu cual accidentenan ta tuma luga riba e cayanan di un isla relativamente chikito.

E cantidad di morto tambe ta pone e situacion den perspectiva. Aruba a cera 2025 cu 10 morto den trafico, segun cifra comparti pa Cuerpo Policial Aruba. Na 2024 tabatin 13. Awor, cu ainda casi tres luna faltando pa 2026 caba, e cifra pa e aña aki ya ta na 12.

Otro accidente fatal a tuma luga dia 13 di september na Grapefield, San Nicolas, unda un hoben di 23 aña a perde su bida despues cu un UTV a bolter. E caso, cu a marca e di 10 morto den trafico pa 2026, ainda ta bao investigacion di Koninklijke Marechaussee bao autoridad di Ministerio Publico.

Mas trempan e aña aki tambe a registra varios accidente fatal, entre otro cu motociclista y peaton envolvi. E diferente tipo di accidente ta mustra cu riesgo den trafico por afecta tur usuario di caminda, sea chauffeur, motociclista, ciclista, peaton of persona riba brommer of UTV.

Ademas di morto y heridonan, cada accidente por tin consecuencia cu ta bay mas leu cu e momento di impacto. Tin famianan cu ta perde un ser keri, personanan cu por keda cu herida pa tempo largo, daño material y costo financiero. Alabes, cada incidente serio ta rekeri intervencion di polis, ambulance, personal medico, ForenSys y, dependiendo di e gravedad, polis tecnico, specialistanan di trafico y Slachtofferhulp.

Seguridad den trafico ta depende no solamente di control y condicion di infrastructura, sino tambe di responsabilidad di cada persona riba caminda. Respeta limite di velocidad, mantene distancia, evita distraccion, uza faha di seguridad y pone atencion na otro persona cu ta riba caminda ta algun di e medidanan cu por yuda reduci riesgo di accidente, specialmente durante anochi y riba camindanan cu visibilidad limita.

E serie di accidente di ultimo dianan ta pone atencion un biaha mas riba importancia di seguridad den trafico. Cu 12 persona cu a perde nan bida riba caminda te awor na 2026, cada usuario di caminda tin un rol importnate den reduci e riesgo di un siguiente tragedia.

Tras di cada cifra tin un persona, un famia y sernan keri cu por keda carga cu e consecuencianan di un accidente pa hopi tempo. Algo cu normalmente ta dura solamente algun minuut por cambia den cuestion di seconde, y p’esey precaucion y atencion riba caminda ta hopi importante.

Respeta limite di velocidad, evita distraccion, mantene suficiente distancia y tene cuenta cu peaton, ciclista y motociclistanan por haci un diferencia importante. Seguridad den trafico no ta depende solamente di control of infrastructura, sino tambe di decisionnan cu cada persona ta tuma tras di stuur of ora e ta haci uzo di caminda.

E meta na final ta simpel: cu cada persona cu sali for di cas por yega na su destino y bolbe cerca su famia sano y salvo. Cada accidente cu por ser evita ta un accidente menos, y cada bida cu por ser proteha ta conta.