proteccion social.jpg

E situacion di trahadonan sin proteccion social trahando pa un dunado di trabou, a bira mas cla pa Banco di Seguro Social (SVb) na momento cu na inicio di 2016 nan a cuminsa cu intercambio di informacion cu Dimas.
Nan a analisa e permiso otorga entre 2008 y 2013 y e cantidad di trahado cu no tabata registra tabata halto. Nan a bin ripara cu cantidad di trahadonan cu ta haci su peticion na Dimas pa prolonga nan permiso di trabou, y cu mester ta registra na SVb, ta trahando si proteccion social.

Director di SVb, sr. Edwin Jacobs ta ripara cu e desaroyo aki ta preocupante. Un tercera parti di peticion pa prolongacion di permiso cu nan a controla pa wak si nan ta registra na SVb, ta resulta cu e trahadonan  no ta registra. Loke ta nifica cu un grupo di trahado ta trahando sin proteccion social na pia di trabou.

Proteccion social

Aruba como un pais civilisa y moderno a bin na mutuo acuerdo cu diferente instancia cu trahadonan riba nos isla mester ta traha proteha contra riesgonan di bida y di trabou te hasta independiente di nan status legal. Nan mester ta proteha contra riesgo di bida manera malesa y riesgo di trabou manera accidente di trabou.

“E parti mas importante for di nos punto di bista como instituto di siguridad social ta e proteccion contra accidente di trabou. Malesa por lo general bo ta recupera bek, pero un accidente di trabou por conduci na un invalidez permanente”, sr. Jacobs a declara.

Un invalidez permanente –segun director di SVb- ta trece como consecuencia cu e persona aki no por uza mas su capacidad laboral pa haya un entrada,  y e ta keda practicamente margina si no ta proteha pa un seguro.

LEAVE A REPLY

Please enter your comment!
Please enter your name here