E islanan den Caribe un biaha mas ta enfrentando un reto ecologico y economico: cantidadnan grandi di yerba di lama sargassum ta flotando actualmente den Lama Caribe y e parti occidental di e Oceano Atlantico. Imagennan di satelite y potret aereo saca como 40km nort di Aruba ta mustra concentracionnan masivo di e yerba bruin ta move den direccion di costa.
Esaki a keda reporta den un relato di portal noticiero, Aruba.nu.
Segun medionan Mericano, e escala di e masa di sargassum e aña aki ta mas grandi cu loke a yega di registra den historia. Cu un superficie calcula di nuebe mil kilometer cuadra, e sargassum ta un menasa pa beach, waf y turismo den e region – maske e temporada di crecemento di e yerba apenas a cuminsa.
Florida ya ta reportando efectonan. E masa di alga ta tapando tuberianan y waf, incluyendo na Miami, y ta causando dolor di cabes pa resortnan na beach. Mientras cu e tapijtnan grandi di sargassum por kibra ainda den lama habri, nan ta bolbe pega hunto na momento cu alcansa e costa, creando un biomasa diki, cu ta hole malo.
Desde 2011, e fenomeno aki a aparece cada bes mas den Caribe, Golfo di Mexico y sur di Florda.
Iniciativanan local ta purbando di haci uso di e sargassum – manera pa construi cas na Mexico of experimentando cu reciclahe – pero den hopi area turistico, e plaga ta keda principalmente un problema logistico. Mester retira Sargassum manualmente for di beach pa reduci e molester causa pa su apariencia y holor. E sargassum ta cuminsa putri tiki despues cu sali riba beach, liberando un holor manera sulfur cu hopi biaha ta disgusta bishitantenan.
E aumento den sargassum ta atribui parcialmente na aumento di temperatura di lama y cambio den coriente di ocean.
Expertonan ta adverti cu paisnan Caribense mester prepara un biaha mas pa un posible fluho di sargassum.
Potret di archivo.
