Den Maart 2024, economista Anton Korinek di Universidad di Virginia, hunto cu Donghyun Suh, a publica un di e estudionan mas importante di e decada riba e futuro di trabao humano: “Scenarios for the Transition to AGI” (NBER Working Paper 32255). E pregunta central ta simpel pero cu impacto pa sociedad profundo: si mashinnan por haci tur trabao cu un hende por haci, kico lo pasa cu salario, desigualdad, y bienestar di sociedad?

Den e estudio aki a construi un modelo econometrico hopi sofistica pa modela kico lo pasa si en berdad AI sigui riba e trajectorio cu e ta awo. Dus por ehempel cu casi tur trabao humano por wordo automatisa dentro di 20 aña. E conclusionnan di e analisis di Anton Korinek, ta uno sumamente crucial pa sociedad den e siglo aki.

Den e scenario aki, e balor relativo di capital lo crece exponencialmente: E ganashinan di AI lo bay principalmente bay na e doñonan di data, algoritmonan, y infrastructura — no na trahadornan humano. Ademas si automatisacion di R&D tambe ta wordo logra, capital ta genera mas tecnologia cu ta genera mas capital — un loop cu por resulta den crecemento exponencial di capital. Tur esaki den contexto cu e poder relativo di labor humano lo cay cu mas di 90% den e mesun periodo aki. Den un zin e poder relativo di capital lo bira 100 biaha mas poderoso relativo na labor dentro di 20 aña.

Esaki ta un scenario, cu lo tin su impacto te na fundeshi di sociedad humano. Den e contexto aki, gobiernonan rond mundo, y esun local na Aruba mester cuminsa prepara pa grijp in, pa proteha bienestar general den plaso strategico. Usando e programa di AI, Claude 4.6 Sonnet, mi a puntra kico por wordo haci pa minimalisa e impacto di e scenario cu Korinek et al. 2024 ta pinta pa sociedad en general. E siguiente ta e conclusionnan cu ta sali di e analisis aki.

1. Entrada Universal Basico (UBI): Un pago mensual pa cada ciudadano, financia door di e ganashinan di AI, garantisando salario minimo sin importa e status di empleo di un persona. Esaki pa proteha trahadornan di contra desempleo masivo.

2. Propiedad Publico/Cooperativo di AI: Gobierno of comunidad ta tuma un porcion di infrastructura di AI of software, pa asina e ganashinan wordo distribui mas ampliamente. Pa nos isla esaki ta nifica, un fondo nacional di AI pa Aruba cu ta beneficia tur residente.

3. Impuesto Progresivo riba Capital AI: Un belasting extraordinario riba ganashi abnormal di companianan AI, y usa e recursonan pa programanan social y redistribucion. Tambe mas belasting riba vermogen/capital en general pa mitiga un division excesivo.

En fin Korinek et al. 2024 ta conclui cu e mesun forsa tecnologico por na mesun momento crea abundancia sin precedente, pa civilisacion humano. Pero na mesun momento tambe por crea desigualdad sin precedente — e resultado ta depende totalmente riba e decisionnan politiconan cu nos ta tuma awe.