Den varios columna den pasado a introduci e tema di “Universal Basic Income”, funda en parti door di mas taxatie di Capital. E columna di e siman aki lo toca un tema un poco mas teoretico pero siguramente hopi relevante pa tur lector. Esta e balans entre “Capital” versus “Labor” den contexto di automatisacion y Inteligencia Artificial (AI).
Hopi di nos lo ta conoci cu e balans basico entre capital y labor. Ehempelnan di labor ta tur forma di entrada cu un persona lo haya door di directamente inverti su tempo den un actividad unda e mercado liber ta duna balor na e esfuerso aki. Esaki por varia di limpia un camber di hotel pa un operacion di curason door di un specialista medico. Na otro banda di e medaya nos tin capital, cu por wordo inverti den proyectonan cu ta brinda mas entrada den futuro optimalmente.
E concepto principal den tur esaki ta e balans entre e 2 factornan aki. Paso nos sa den pasado cu cada extremidad den spectrum politico cu ta beneficia un riba e otro, hopi bes no ta caba bon.
Pero Simon, net bo ta bisa cu conceptonan radical no ta caba bon, pero e ora con por ta cu bo ta skirbi over di taxatie di Capital pa financia un Universal Basic Income? Simplemente paso ya caba tin un desbalansa grandi entre Capital versus Labor, unda cu Capital ta demasiado dominante. Mi ta corda na aña 2017 caba, Guardian Newspaper na Inglatera a introduci e concepto di “Gilded Age di Siglo 21”, unda nos ta wak cu e ultra-rico tin mas abundancia cu e resto di full e poblacion mundial. Si nos wak otro indicadornan manera e GINI-coefficient, Top 1% Earners to GDP ratio. Nos por conclui cu tin un desbalansa entre e forsa di Capital versus Labor y entre e Top 1% y e resto pueblo.
Pa haci e problema fundamental aki mas complica ainda, nos tin cu tene na cuenta e revolucion masivo cu nos ta bezig ta wak den AI. Den varios publicacion, Prof. Dr. Anton Korinek ta mustra via varios calculacion hopi complica cu tin scenario unda den 20-30 aña casi tur trabou humano por wordo automatisa door di AI & Robotica. Esta un “Artificial General Intelligence” scenario.
Alright, un lector lo puntra dicon esaki ta relevante pa ami den dia di awe? Wel, simplemente paso e balans entre Capital versus Labor, lo cambia den maneranan profundo mes. Den su calculacionnan den un AGI scenario (automatisacion completo) Korinek et al. 2023, ta mustra cu Capital lo crece 400 biaha mas rapidamente versus Labor. No 10, ni 100 pero 400 biaha mas hopi. E efectonan cu esaki lo por tin riba sociedad en general ta di profundidad inmenso mes. Vooral si no tin sistemanan instala unda crecemento di Capital por flow back na pueblo en general.
Si en berdad partinan grandi di mercado laboral wordo automatisa, e funcion di conceptonan manera Entrada Universal y taxatie di Capital lo merece hopi mas peso den discusionnan, ya den dia di awe caba. Teniendo tur e factornan aki na cuenta, unda e balans entre capital/Top 1% ya caba ta “off” y bezig ta wak factornan di innovacion tecnologico internacional ta pone mi indica cu esaki ta discusionnan cu mester cuminsa pensa over di dje den forma serio.
Un mundo unda casi tur trabou ta automatisa y unda e balans entre Capital & Top 1% y resto di Pueblo ta relativamente den balans por ta un mundo hopi bunita mes, na otro banda si nada no wordo haci y Capital crece 400 biaha mas hopi cu labor den 30 aña binidero, por crea scenarionan masha scur mes. E ta keda na nos pueblo y ultra-kader pa designa un sistema social y economico cu ta na beneficio di full pueblo.
