Dia 2 di april tabata dia internacional di conscientisacion di autismo. Fundacion Autismo Aruba a splica tocante e fundacion y con pa ta consciente di persona cu autismo den temponan di crisis.

Carolina Span, miembro di fundacion autismo como investigado ta comparti cu e dia aki ta celebra rond di mundo caminda na Ingles ta bay cu mensahe ‘light up blue’, cende un luz blauw.

Riba dia 2 di april, nan a curasha tur hende pa bisti na blauw, cende nan cas of negoshi cu luz blauw. Di e forma aki ta duna idea pa crea conscientisacion visual, pa fomenta mas ‘comprension y aceptacion’ di persona autista den comunidad, ‘pa nan por yega na incluison den comunidad’.

Span ta bisa cu e situacion den e fundacion ta bayendo bon. Sinembargo, na Aruba no tin un bista di cuanto hende tin autismo. “E no ta algo cu por asina lihe, pasobra mester sa e diagnosis di e persona. Mester pasa den un proceso. Tin Respaldo, psikiatra di mucha of psicologo cu ta haci test preliminario.”

Span ta bisa cu e cifra no ta conoci. Pero e ta remarca cu si mayoria di persona cu ta ricibi un diagnostico, e prome cos cu nan ta haci ta busca ayudo. E segundo paso ta pa busca e fundacion.

Cu e proposito aki e fundacion a lanta como un plataforma pa yuda e mayor den e proceso ora tin un yiu cu autismo, pues pa yuda mayornan na Aruba pa busca y haya diagnostico pa nan yiu. “E ta algo bon, pasobra e momento ey nan ta compronde pakico e yiu of ser keri ta di cierto manera, y cu prome nan tabata den limbo.”

E ta agrega cu AZV no ta cubri tur e tratamento cu un persona cu autismo mester, y hopi biaha mayornan no sa ki stap pa tuma. Span ta bisa cu mas hoben e persona ta a momento di ricibi diagnostico, ‘mas grandi e chens’ pa e mucha of hoben adapta su mes y bira un miembro productivo di sociedad cu por funciona na su maximo potencial.

Pa e motibo aki, e fundacion ta keda mustra riba e importancia pa e mayor por tin e diagnostico for di trempan. “Por ta bon pa haci, sinembargo, por ta ‘eng’ pa e famia.” E fundacion ta zorg pa conecta e famia cu profesionalnan cu por duna ayudo.

Ademas, nan tin un grupo di sosten den cual mayornan por comparti cu otro mayor cu ta den e mesun situacion, duna otro ‘tips and tricks’ di kico pa traha cune y kico pa evita. “Nos ta wanta e comunidad di autismo.”

Pa e situacion actual inusual cu mundo ta pasando aden cu pandemia di coronavirus, Span ta bisa cu esaki no ta facil pa niun persona, y esaki ta conta pa persona cu autismo. Un persona autista tin un rutina, y cu e situacion esaki por cambia, conduciendo na insiguridad di e persona ya cu e no sa con pa sigui cu su rutina.

Span ta splica cu pa e mayor e por ta dificil, pasobra nan no por contesta of splica nan yiu ki tempo henter e situacion lo cambia bek, ya cu ‘nos niun sa con largo e ta bay dura’. “Nos conseho ta pa check hende cu tin un familiar cu autismo pa mira con ta tratando cu e situacion.”

Mayornan mester compronde y prepara cu muchanan cu autismo lo tin momento di ‘meltdown’ of lo ripara cambio den nan yiu. Tambe mester compronde cu si ta un situacion fastioso pa e mayornan, ta pio pa un persona cu autismo pasobra nan tin dificultad pa custuma y adapta.

Span ta keda bisa cu mester sigui comparti e mensahe di bondad. Si nan ta sinti cu mester comparti cu otro den necesidad special tambe, pa ta consciente cu pueblo ta pasando den un momento dificil. “E ta dificil, y no por mira ki dia e ta yega na un fin.” Sinembargo, e ta bisa cu por haci algo bunita pa otro.

Pa dia di conscientisacion, a bin cu un reto di ‘bondad ta conta’. Nan tin partner den Latino America manera na Argentina, Brazil, Colombia, Peru y Merca, cu ta campaña pa comparti bondad. E campaña ta manda un mensahe of video pa curasha hende cu tin autismo.