(AP) — E carrier di avion mas avansa di Merca a yega Lama Caribe ayera den un despliegue di poder militar Mericano, lantando pregunta tocante kico e fluho nobo di tropa y arma por señala pa e intencionnan di adminsitracion di Trump den Sur America, mientras ta conduci atakenan militar contra barconan sospecha di transporta droga.
E yegada di e USS Gerald R. Ford y otro barco di guera, anuncia pa Marina den un declaracion, ta marca un momento mayor den loke e administracion ta insisti ta un operacion anti-droga, pero a ser mira como un tactica di escala presion contra presidente Venezolano, Nicolas Maduro. Desde comienso di september, atakenan Mericano a mata al menos 80 persona den 20 atake contra botonan chikito acusa di transporta droga den Caribe y oriente di Ocean Pacifico.
E Ford ta completa e despliegue mas grandi di poder Mericano den e region den varios generacion. Cu su yegada, “Operation Southern Spear” ta inclui casi un decena di barco di Marina y alrededor di 12mil marinier.
E grupo di carrier di atake, cu ta inclui scuadron di avion di combate y destroyer di misil guia, a transita e Paso Anegada cerca di British Virgin Islands diadomingo mainta, segun Marina Mericano.
Rear Adm. Paul Lanzilotta, kende ta comanda e grupo di atake, a bia cu ta bay reforsa un forsa ya caba grandi di barco di guera Mericano “pa protege seguridad y prosperidad di nos nacion contra narco-terorismo den Hemisferio Occidental.”
Adm. Alvin Holsey, comandante cu ta supervisa Caribe y Latino America, a bisa den un declaracion cu forsanan Mericano “ta para cla pa combati e menasanan transnacional cu ta busca pa desestabilisa nos region.”
Holsey, kende ta bay retira proximo luna despues di apenas un aña na su cargo, a bisa cu despliegue di e grupo di atake ta un “stap critico den reforsa nos resolucion pa protege e seguridad di Hemsiferio Occidental y e seguridad di Nacion Mericano.”
Na Trinidad y Tobago, cu ta apenas 7 miya leu di Venezuela na su punto mas cercano, oficialnan di gobierno a bisa cu tropanan a cuminsa “ehercicio di training” cu ehercito Mericano cu ta bay tuma lugar durante mayor parti di e siman.
Minister di Asunto Exterior, Sean Sobers a describi e ehercicionan conhunto como e di dos den menos cu un luna y a bisa cu nan tin meta pa combati crimen violento riba e nacion isla, cu a bira un punto riba e ruta di cargamento di droga dirigi pa Europa y Nort America. E prome minister tabata abierto den su sosten pa e atakenan militar Mericano.
E ehercicionan ta bay inclui marinier di e 22nd Expeditionary Unit cu ta stacion abordo di e barconan di Marina cu ta para cerca di costa Venezolano pa lunas.
Gobierno Venezolano a describi e ehercicionan di training como un acto di agresion. No tabatin comentario inmediato ayera tocante e yegada di e USS Gerald. R. Ford.
Mientras tanto, Secretario di Ehercito, Dan Driscoll a bisa diadomingo cu grupanan Mericano tabata training na Panama, subrayando e enfoke cada bes mas fuerte di e administracion riba America Latino.
“Nos ta reactivando nos scol di selva na Panama. Nos lo ta cla pa actua riba cualkier cos” cu presidente Donald Trump y Secretario di Guera, Pete Hegseth mester, el a bisa “Face the Nation” riba CBS.
E administracion a insisti cu e despliegue di forsa Mericano den e region ta enfoca riba stop e fluho di droga yegando Merca, pero no a publica evidencia pa sostene su afirmacionnan cu esnan mata den e botonan tabata “narcoterorista.” Trump a indica cu accion militar lo expande mas leu cu atake riba lama, bisando cu Merca lo “stop e droga drentando riba tera.”
Pa largo Merca a usa carrier di avion pa presiona y disuadi agresion di otro nacionnan pasobra nan avion di guera por ataca obhetivonan profundamente paden di otro pais. Algun experto ta bisa cu e Ford no ta adecuado pa combati cartel, pero por ta un instrumento efectivo di intimidacion pa Maduro den un esfuerso pa fors’e pa retira.
Secretario di Estado Mericano, Marco Rubio ta bisa cu Merca no ta reconoce Maduro, kende ta ampliamente acusa di horta eleccion aña pasa, como lider legitimo di Venezuela. Rubio a yama gobierno Venezolano un “organisacion ‘transshipment’” cu ta coopera abiertamente cu esnan traficando droga.
Maduro, cu ta enfrenta cargo di narcoterorismo na Merca, a bisa cu gobierno Mericano ta “fabricando” un guera contra dje. Riba su pagina di Facebook, Maduro a skirbi diadomingo cu “pueblo Venezolano ta cla pa defende nan nacion contra cualkier agresion criminal.”
Recientemente, gobierno Venezolano a gana un mobilisacion “masivo” di tropa y civil pa defende contra posible atake di Merca. Maduro y otro oficialnan den partido socialista di Venezuela ta bin atendiendo rally weekend ultimo pa sostene e creacion di comitenan di bario cu ta bay ta encarga di aumenta miembresia den partido socialista di Venezuela, y promove politica di e partido.
Trump a hustifica e atakenan contra botonan di droga bisando cu Merca ta den “conflicto arma” cu cartelnan di droga mientras bisando cu e botonan ta opera pa organisacionnan terorista stranhero.
El a ricibi critica di lidernan den e region, hefe di derecho humano di Nacionnan Uni, y legisladornan Mericano, incluyendo Republicanonan, cu a presiona pa mas infromacion riba ken ta obhetivo y e hustificacion legal pa e atakenan contra boto.
Republicanonan den Senado, sinembargo, a vota pa rechasa legislacion cu lo a pone un limite riba habilidad di Trump pa lansa un atake contra Venezuela sin autorisacion di Congreso.
Expertonan no ta di acuerdo si por usa avion di guera Mericano pa ataca obhetivonan terestre den Venezuela. Di cualkier manera, e boto di 100.000 ton ta mandando un mensahe.
“Esaki ta e anker di loke ta nifica pa tin poder militar Mericano atrobe na Latino America,” segun Elizabeth Dickinson, analista senior di International Crisis Group pa region Andes. “Y el a lanta hopi ansiedad den Venezuela pero tambe na henter e region. Mi ta kere tur hende ta observando esaki cu sorto di rosea wanta pa mira con dispuesto Merca ta realmente pa usa forsa militar.”
