Carta dirigi na minister di Labor: Pensionadonan y clase trahador di Aruba ta enfrenta un gran variedad di problema cu mester di solucion urgente

Un ciudadano a dirigi un carta na minister di Labor, Wendrick Cecilia (AVP), y ademas di a trece dilanti algun di e dificultadnan cu e clase trahador di Aruba ta enfrenta y algun posible solucion pa esaki, a menciona tambe pensionadonan. Bon Dia Aruba a haya acceso na e carta aki y ta trece un resumen tocante e varios puntonan cu a menciona y trece dilanti na e minister.

E carta a cuminsa tocante e hecho cu actualmente e pensionadonan no tin un entrada y ta bibando den un situacion cu ta sumamente malo. Nan entrada actual ta “consisti solamente di e pension di biehes for di SVB cu no ta yega pa cubri nan gastonan. Si tin problema di salud cu un di nan o tur dos mester bay den centro di cuido, e situacion ta bira pio,” e ciudadano a skirbi. Tambe a menciona cu un posible solucion ta di tin mas fondo di pension pa asina e pensionadonan por tin mas entrada. Un otro punto cu el a trece dilanti ta cu den su opinion gobierno mester cumpli cu Memorie van Toelichting di e NPR-APFA di 2005. El a skirbi cu den sector publico na mei di aña 2005 a crea NPR den APFA pa asina tur e trahadornan den sector publico por bira miembro di APFA.

A menciona tambe cu algo cu e gobierno mester frena ta e practica di contrata trahadornan den servicio temporal, yama tijdelijk diesnt na Hulandes. E personanan aki ta keda varios aña cu contract individual. Tambe a trece dilanti cu “mester elimina tuma trahadornan den servicio di uitzendbureau pa añanan largo. El a menciona tambe entre otro cu “tin un discusion fuerte na Aruba, pa empresarionan y shareholdernan di empresanan lanta un fondo di pension pa nan. Nan tin tur derecho pa hacie, nan tambe kier sigura nan futuro. Mi deseo ta cu pronto esaki lo ser cumpli. Esaki ta un bunita ehempel di kico mundo politico mester haci pa e 70% di pueblo kendenan ta cay den problema grandi ora nan bay cu pension.”

Den e edicion di awe nos lo cubri e otro puntonan cu e ciudadano aki a trece dilanti pa loke ta trata e pensionadonan di Aruba.

Segun e ciudadano, un asunto cu mester di investigacion ta e areglo cu gobierno a introduci un 7 pa 10 aña atras, pues ta trata di e areglo general pa e sector priva unda e trahador ta paga 2 of 3% di su salario y e dunador di empleo a paga mescos na un entidad di compania di seguro. E ciudadano a haci mencion di manera por ehemplo, ENNIA “pasobra nos sa cu Banco Central ta haci e controlnan necesario. Pero mi no tin e noticia cual otro organisacion di trahadornan o sindicato tambe ta haci e controlnan riba e fondo aki.”

El a agrega cu tambe ta bon conoci e caso di ENNIA na Corsou, unda despues di algun aña “na timon di e compania aki, Sr. Ansary a saca banda di 1 biyon florin pa inverti na Merca, pero despues no a trece e placa back den ENNIA di Corsou. E consecuencia ta, cu miles di yiunan di Corsou kendenan a paga un bon pension y ta spera un pension di 2 pa 3 mil florin pa luna, awo ta ricibi solamente 2 o 3 cien florin pa luna.” Den e caso aki, gobierno di Corsou a interveni y for di e presupuesto di Corsou, gobierno ta yudando e famianan cu a sali perhudica.

Den e carta a puntra “pueblo trahador kier sa con e situacion di e fondo na Aruba ta?” cual e ciudadano mes a contesta bisando cu “e proposicion pa aumenta e pension di biehes di SBV cu 50% ta un decision adhoc y no tin argumento husto. Berdad ta cu e grupo di pensionadonan cu solamente e pension di SBV ta pasando den duro y mester di ayudo financiero.”

Un sugerencia ta pa gobierno “percura pa den un fase transitorio nan por ricibi un entrada extra pa nan no cay den pobresa extremo. Pa esaki gobierno mester lanta un comision chikito pa traha reglanan cu lo soluciona e problema aki.”

Ademas di e pensionadonan, e ciudadano tambe a papia den su carta tocante e bida caro cu e clase trahador ta pasa aden actualmente. “Na Aruba nos ta hibando un bida cu ta carisimo. Nos mester pone e mecanismo cu tabata existi den pasado pa controla e subimento di prijsnan y e control severo cu mester bin back pa duna e trahador y su famia un alivio.” Segun e ta comenta, importadornan di cuminda actualmente tin un poder grandi y nan a ricibi esaki for di e mundo politico.

El a menciona 5 asunto riba cual politiconan mester tuma un decision:
Prome, no tin un organisacion pa defende e consumidornan, for di mundo sindical, for di organisacionnan social y for di gobierno mester funda un sorto di Consumentenbond. Na Aruba nos tabata conoce CAS, Consumidor Arubiano Solidario.

Di dos, durante e gobernacion di 2010 pa 2017 a privatisa e puerto di container, unda nos alimentonan y otro articulonan di uso ta drenta Aruba. Un grupo financiero poderoso ta maneha e waf di container, nan prijsnan cu nan ta cobra pa container ta hopi determinante riba e prijs di tur articulonan cu ta drenta via e waf. Gobierno bo por bisa cu nos tin ningun clase di control.

Di tres, e importadornan di cuminda, hopi biaha ta nan ta dicidi riba e prijsnan y aki tambe no tin e debido control di e Departamento di Asuntonan Economico.

Di cuatro, riba e prijsnan di supermercado no tin concurencia, parce tin un formacion di cartel pa nan mantene nan prijs halto y no tene diferencia grandi den e prijs di articulonan hopi bendi.

Di 5, mester formalisa e ley cu e minister di Asuntonan Economico anterior y actual den wanta den su oficina, relaciona cu interes husto, ora institutonan financiero y otro instancianan comercial presta placa o bende articulonan riba cuota, pidiendo interes halto.

Por ultimo, e ciudadano a menciona cu tin un falta di politica corecto den e ultimo 15 pa 20 aña di gobierno na Aruba. E ta declara cu e “Arubiano ta perdiendo su tera cu ta ser cumpra door di stranheronan rico. Nos politiconan, sigur e minister di Labor mester uni na fabor di nos pueblo pa trece leynan cu ta proteha e pueblo trahador.

Pa loke ta trata e problema tocante terenonan y casnan cu no ta presente, e ta sugeri pa gobierno trece un ley pa protege Arubianonan. E stranhero cu no tin 10 aña ta biba na Aruba no por cumpra tereno na Aruba y den caso cu ta cumpli cu e condicion di 10 aña, e no por cumpra un tereno o cas cu balor di menos di 1,5 miyon florin.

El a clausura su carta bisando: “Tin mas problemanan general di trahador pa e gobierno nobo, cualnan ta grita pa solucion,” manera debenan nacional haltisimo cu pagonan grandi anual na interes, problemanan den enseñansa, corupcion den sector publico, falta di profesional, pueblo di Aruba cu ta birando mas grandi sin e cuido apropia, estilo di bida cu ta causa obesidad, solucion na e problema di indocumentado na un manera humano, careteranan den mal condicion, cooperativismo sin falta di gobierno, mas ayudo den e sector primario, apertura di frontera cu Venezuela pa ricibi fruta y berdura, y mas.

Pa motibo cu nos ta un pueblo cu ta opera bao un cultura democratico, e libertad di expresion ta algo na cual nos tin derecho automaticamente y cu esaki nos tin e derecho di manda carta, solicita reunion, haci uso di medionan publico y organisa peticionnan o reunionnan comunitario pa expresa nos preocupacionnan o trece nos sugerencianan pa solucion na e problemanan dilanti.

Ban haci uso di nos derechonan y expresa nos mes pa e bienestar y futuro di nos pais.