Cartelnan di droga na Mexico ta huur Airbnb pa sconde droga

(Infobae) – Aunke Ciudad di Mexico ta clave pa trafico di droga pa otro parti di e pais –incluso pa Merca- pa su ubicacion geografico, datonan reciente ta indica cu organisacionnan criminal no solamente ta probecha e ruta terestre y aereo di e capital pa nan actividadnan delictivo, sino cu tambe ta usa casnan y apartamentonan cu nan ta huur pa sconde nan droganan.

Asina a informa Secretaria di Siguridad Ciudadano (SSC) di Ciudad di Mexico Pablo Vasquez, ken den un conferencia di prensa hunto cu e persona encarga di Fiscalia General di Husticia (FGJ) Ulises Lara, a ofrece detayenan tocante e confiscacion grandi di 100 kilo di cocaina cu tabata scondi den un cas cu nan a huur di e app Airbnb.

E hechonan a sucede durante e prome oranan di 14 di maart ultimo na colonia di Guadalupe del Moral, alcaldia di Iztapalapa.

Di acuerdo cu datonan di SSC, e operativo tabata posibel debi cu autoridadnan di tres orden di gobierno a identifica un celula delictivo cu tabata transporta droga for di Chiapas hasta e capital di e pais.

Despues di varios luna di investigacion, a determina cu e grupo criminal aki tabata utilisa trucknan pa transporta cantidad grandi di droga y un bes na Ciudad di Mexico, nan tabata sconde e droga den casnan y apartamentonan cu a huur pa asina usa nan como bodega.

E investigacion a revela cu e droga tabata permanece warda pa varios dia den e casnan aki y poco a poco nan tabata sakel’e pa hib’e na otro entidad di e pais, cu Merca como destino final.

Potretnan di e mercancia balora den mas di 20 miyon peso, ta indica cu e modus operandi tabata aplica pa Cartel Jalisco Nueva Generacion, algun di e paketenan di cocaina tabatin un sticker cu e siglanan “CJNG.”

Vasquez a confirma cu tin algun prueba grafico cu por apunta na un organisacion specifico, pero a descarta duna un nomber den particular tanten lo conclui cu investigacionnan.

Den e luga a haya paketenan cu tabata contene droga, asina como un arma di candela largo, un corto, tres telefon, un peso, un mashin di conta placa y dos saco di biyetenan di diferente denominacion.