Incubator ta un iniciativa di Cas di Cultura unda ta stimula grupo di varios area di arte sea teatro, baile, musica, cine y otro industria creativo pa desaroya talento di alumno y pa purba yega na expresionnan nobo. Asina e INCBTR ta trahando cu partnernan multidisciplinario cu ta ofrece cursonan di baile, skirbimento, arte di tarima, cortometrahe y fotografia.

Olga van Bochove, kende ta esun encarga cu e INCBTR a splica cu e plataforma ta un abreviacion di ‘Incentivando, Creatividad y Broei Talento pa medio di Realisacion’. E ta un di resultado di e vision mas amplio di Cas di Cultura pa enfoca mas activo riba arte di tarima, industria creativo, expresion corporal, creatividad y desaroyo di talento hunto cu experimentacion den arte.

‘Mehora calidad di arte ta mehora calidad di bida’
Segun e ta continua splica cu e filosofia general di INCBTR, como espacio fisico tambe (conoci manera Kleine Balletzaal) no ta solamente pa arte y cultura florece den dje, pero tambe pa sirbi como un luga inspirativo pa varios otro tipo di actividad manera ‘brainstorms, reunion, presentacion, show chikito of grandi of un breakout room durante congreso.

E mision di Cas di Cultura su INCBTR ta pa produci arte di tarima (performing arts) educativo, di calidad halto cu ta stimula, involucra y entretene. Cu por eleva e calidad di bida pa ciudadanonan di Aruba.

Tambe cu ta afirma e base comun di experiencia humano pa medio di excelencia den produccion y interaccion educativo. Segun Van Bochove, INCBTR t’ey pa aspira e ser humano pa ta un lider den un comunidad pa produccion di arte di tarima di calidad y mas amplio den un industria creativo cu por ilumina, investiga e area comun humano di nos tur.

Nan ta afirma cu arte di tarima y e industria creativo por y ta entretene, stimula, inspira, cuestiona, eleva y conscientisa. ‘Nos creencia ta cu arte mester ta pa tur hende y mester genera interaccion y discusion di balor’, el a expresa.

E INCBTR a tene varios actividad pa aña 2019, les di actuacion bou guia di Charles Croes, Capoeira bou guia di Chris Goedthart, Stitching Saturdays bou guia di Jess Wolff, Scriptwriting bou guia di Ben Heinze, Salsa Specialty bou guia di Freddy Gross, Film Summer Camp bou guia di Rebecca Roos y fotografia bou guia di Kuro Muller.

Sinembargo, e ta splica bou di e mesun dak di Cas di Cultura tambe tin otro departamento manera Scol di Musica Rufo Wever, Da Vinci Academy y Scol di Baile, cual di nan tambe ta formando partners pa asina traha conhuntamente mas actividad y duna mas nificacion na Cas di Cultura como centro cultural completo.

Tambe lo por haci uzo di e local pa show y presentacion sea mas chikito cu e mesun beneficio cu otro grupo di afo. Lo tin un presentacion di e INCBTR den cual tur usuario di Cas di Cultura por showcase studiantenan y docente talentoso. Asina por crea mas programacion artistico- cultural y ta duna talento mas oportunidad pa expresa y experiencia con pa presenta nan mes y nan talento.