Casa Cuna cu proyecto di tres aña pa eleva profesionalismo y servicio

Den cuadro cu cumplimento di 60 aña di servicio di Casa Cuna e aña aki, nan ta anuncia continuacion di nan proyecto di profesionalismo. Diahuebs cu a pasa hunto cu otro instancianan a continua cu e di dos parti di e tayer di specialistanan for di Hulanda.

Fundacion Casa Cuna Progreso ta funda desde 4 april 1957. Manera conoci, nan ta un internaat cu ta brinda ayudo 7×24 na muchanan entre 0-8 aña. “Nos meta ta pa cuida y guia e muchanan cu pa un of otro motibo no por biba na cas. Door di abuso fisico, sexual of negligencia. Nos fundacion ta duna sosten na e muchanan aki y tambe ayudo na e mayornan den e parti educacional,” directora Quilin Arends-Maduro ta conta Bon Dia Aruba. E ta sigui splica nos: “Nos a ripara cu mirando e cantidad di muchanan y diferente traumanan mas complica cu e muchanan ta haya nan mes aden, nos mester a hisa nos calidad di trabao/profesionalismo interno.”

Centro di experticio
E fundacion kier eleva nan calidad interno mas ainda segun e directora ta conta nos. Nan ta den un proceso di renobacion cu e meta pa bira un centro di experticio na Aruba. Pa por realisa e ambicion aki, Casa Cuna a acerca Stichting Fier Fryslan di Hulanda (Leeuwarden) pa por coach nan cu esaki. Tanto pa e parti di contenido como pa e parti di organisacion pa por yega na un nivel di profesionalismo mas halto. E directora ta bisa nos tambe cu nan ta preparando pa e proyecto di mama hoben cual nos lo busca pa informa mas riba dje pronto. Esaki ta otro proyecto cu lo ta riba tereno di Casa Cuna. E ta diseña cu e meta pa brinda mamanan hoben oportunidad pa cria nan yiunan y prepara nan mes riba tereno social, scol y yuda nan sali for di e circulo vicioso cu hopi biaha nan ta haya nan mes aden segun Casa Cuna. E inversion di e proyecto particular aki a keda financia door di fondonan di Aruba Way y pronto Casa Cuna lo acerca comerciantenan cu meta pa duna esunnan vulnerabel toch un oportunidad y ‘second chance’.

Bek riba e proyecto di profesionalismo, Fier Fryslan a bay di acuerdo pa yuda Casa Cuna cu e parti di promove conocemento di henter e team. Pa cuminsa, nan lo manda dos miembro di directiva cu lo yuda den temporada di 9 november te cu 18 di november 2017. E proyecto ta financia pa Cede Aruba. Un rekisito di Cede Aruba ta cu esaki lo ta un proyecto integral. Kiermen cu no solamente Casa Cuna mester beneficia di dje, pero tambe pa traha cu mas hende den e sistema di por ehempel: Voogdijraad, Fundacion Guia Mi, instancianan ruman di Casa Cuna manera Fundacion pa Hende Muhe den Dificultad, Imelda Hof y Centro Ortopedico entre otro.

 

Organisacion Fier Fryslan
Fier Fryslan tin hopi experiencia riba guia di mamanan jong, traficacion di hende, tambe hobennan y hende muhe cu ta pasa den violencia. E fundacion ta haciendo e tayernan aki boluntariamente pero pa e parti di profesionalismo, cu otro hende mester bini di afo, mester financiamento. Anto pa esaki, Cede Aruba a yuda nan financia e proyecto aki cual ta uno di tres aña. A cuminsa oficialmente na november 2016, anto e proyecto ta encera diferente cos. Mester pone e cas na ordo: cuminsa na analisa tur procedura con e muchanan ta bin te ora nan ta sali. Check tur e dossier di personal y tambe di muchanan. Pa esaki tambe a tuma den servicio un biaha pa siman un GZ psicologo, cual ta hopi scars na e isla segun Casa Cuna. E lo percura pa analisa y traha plannan pa e muchanan y mayornan. Tambe nan a haya un ortopedagogo pa yuda cu e parti aki di profesionalismo y pensa riba tratamento pa e muchanan. Sin laga afo, un psicologo cu a tuma den servicio pa full-time e aña aki desde maart.

“Cu esaki nos ta elevando e calidad di servicio cu nos kier brinda na tanto nos muchanan como mayornan. Nos kier bin cu cursonan tambe pa mayornan bek. Locual nos a siña tambe ta cu e edad cu nos ta traha cu ne ta uno hopi clave pa e comunidad tambe. Pasobra si nos por yuda e muchanan aki cu nan trauma na un edad jong, esaki por scapa cu e trauma por ripiti of bira kisas un criminal den futuro,” sra. Quilin ta bisa. E intencion tambe ta pa Fier Fryslan bini bek den maart di otro aña cu mas profesional pa yuda nan tambe den e trayecto aki. Y tambe eventualmente algun di e lidernan di instancianan di Aruba por bay Hulanda pa sigui cu esaki.

 

 

You May Also Like

Ley di oficialisacion di Papiamento tin restriccion ‘discriminatorio’

A pesar cu 14 aña pasa,  Papiamento a bira un idioma oficial na Aruba, ...

Interpark Coney Island ta cla pa habri diahuebs

Instancianan concerni a keda cla cu tur inspeccion Interpark Coney Island ta cla pa ...

video agresion fisico y verbal.JPG

Video pa hendenan ‘bira mas consciente di maltrato’ a bira viral

Maria Agramonte ta e persona cu a graba un video cu ta mustra un ...

refineria

Reapertura di refineria: kico ta nifica pa trabou y nos economia

Manera Bon Dia ya a trece awe mainta e refineria na San Nicolas lo ...

simar reunion premier Eman Br.jpg

Den un siman Simar lo haya contesta si nan lo reuni cu minister di Enseñansa

Ayera den oranan di mainta sindicato di maestro Simar a sostene un reunion cu ...

Protesta ANSA 2

Sindicato mas positivo riba situacion laboral na ANSA

Despues cu sindicato STA a reuni cu Air Navigation Services Aruba (ANSA) y mediador ...