Ayera den Corte di Prome Instancia di Aruba a tuma luga e prome audiencia, “regiezitting” den caso Caret, relaciona cu e morto di e hoben di 19 aña Ayden Lanoy. E agentenan policial, M. Violenes y R. Dirksz ta ser acusa di complicidad di homicidio; intento di homicidio of intento di maltrato pisa.

Sala di corte tabata completamente yen. Extra security tabata presente den sala y oficialnan di KIA fuertemente arma tambe tabata presente. E audiencia a atrae un atencion masivo di media y di publico, un refleho di e deseo general pa haya claridad riba e circunstancia cu a termina den e morto di e hoben Ayden Lanoy.

Na comienso hues a mustra comprension pa e impacto emocional di e caso riba famia y comunidad, pero a pidi pa tur hende mantene calma y respet durante e proceso. El a enfatisa cu si un persona ta sinti cu nan emocionnan ta bira demasiado, por sali un momento for di sala y despues drenta back pa evita cu tension of rabia tuma control di e situacion.

Durante e sesion, hues a ripiti cu e meta di e corte ta un proceso husto y honesto, basa riba pruebanan solido y investigacion serio. El a remarca cu un caso di e magnitud aki ta rekeri atencion detaya na tur evidencia, pa cu e decision final por refleha husticia pa tur banda – tanto pa e famia di e victima como pa e sospechosonan.

Hues a verifica cu el a ricibi tur loke ta pertenece na e dossiernan di investigacion, dos dossier,cu ta contene e resultado di investigacion inicial y evidencia, manera imagennan y audio.

Durante e prome audiencia aki e abogadonan di e acusadonan a haci nan peticionnan pa investigacion adicional mas profundo of aclaracion di cierto puntonan, cual hues tabata dispuesto pa considera, basta cu e peticionnan ta rasonabel y duna aporte real na e caso.

Un di e punto principal di discusion tabata e material audiovisual, particularmente e grabacionnan di camaranan cu tabata mustra e momento critico di e incidente na Madiki. Tabatin dos camara cu a registra e mesun evento, pero cu algun discrepancia den e audio y e video.

E abogadonan di defensa, entre nan abogado Vito Carlo, a insisti riba importancia di trata e grabacionnan cu precision. El a indica cu den un di e camaranan, e audio y e imagen ta core sincronisa, pero den e otro, e audio ta atrasa, loke por crea confusion riba e momento exacto cu a los e prome tiro, un punto cardinal pa defensa y crucial pa determina si tabatin un tiro di advertencia y den ki momento e tironan a tuma luga.

E peticion di defensa tabata pa haya un informe adicional (proces-verbaal) cu un resumen detaya di loke tanto ta wak como loke ta ser scucha den tur dos camara. Abogadonan di defensa a pidi tambe pa haci un investigacion pa medio di un tercer partido independiente, cu e condicion cu e ta un instancia reconoci y confiabel den e area forensico audiovisual.

E hues a splica cu den e dossier ya tin paginanan cu ta detaya e secuencia di e tironan y e diferencianan den grabacion. Segun corte, esey ta suficiente pa un evaluacion inicial di e evidencia visual. A nota cu segun e standard di investigacion, un discrepancia leve den audio no ta automaticamente altera e conclusionnan, basta cu e fuente principal ta corectamente sincronisa.

Fiscal di Ministerio Publico (OM) a confirma cu segun e investigacion, e grabacion di camara number un ta e fuente mas confiabel, y cu e proces-verbaal di video y audio ya a keda completa y ta util pa evaluacion di e caso. Un informe di audio solamente, segun e corte y e fiscal, no ta balor relevante na e caso.

Pa e motibo ey, hues a rechasa e peticion pa un proces-verbaal di audio separa. Corte ta considera cu e investigacion forensico ta completo pa e etapa aki.

Pa loke e peticion pa ekipo di defensa realisa un analisis extenso pa medio di un tercer partido, tanto hues y OM a indica cu ta nan derecho pa hacie, y a indica cu esaki mester ta cla prome cu februari otro aña.

Un parti importante di e audiencia tabata dedica na e posicion di e famia di e victima den e caso aki. Hues a splica cu segun ley, e famia tin un rol reconoci den e procedemento penal, como partido afecta y tin derecho pa expresa nan sentimento y puntonan di bista. Den e caso aki, esey ta inclui e mayor di Ayden, su pareha y mama di su yiu.

Abogado di e famia di Lanoy, abogado Geert Hatzmann, a splica na hues cu mayornan di Ayden a scoge pa usa e derecho di “spreekrecht” durante e tratamento di e caso mes, pa comparti nan palabra den corte, na nan idioma natal, un eleccion cu ta reconoce importancia di expresion emocional autentico. Pa preveni un situacion traumatico, a splica cu si emocionnan bira demasiado fuerte, e abogado lo asumi e lectura di nan declaracion den idioma Hulandes.

Hues a mustra empatia pa e dolor di e famia, pero a enfatisa cu den un “strafzaak” e persona sospechoso ta central, y cu corte tin e obligacion di evalua tur prueba y argumento segun ley, sin preferencia emocional. El a ratifica cu e meta final ta husticia, y cu solamente un proceso honesto por duna paz y claridad na comunidad.

Hues a anuncia cu e tratamento profundo di e caso ta planifica pa dia 20 di februari 2026, den cual e hues lo discuti e hechonan, haci preguntanan na e sospechosonan y analisa e material visual den sala. Durante e sesion aki hues evalua tambe e circunstancia personal y profesional di e sospechosonan, pa un vision completo di e situacion.

Durante e prome audiencia aki, a discuti si e imagen visual di e suceso lo ser mustra den corte durante e tratamento. Aunke e representante di e famia, abogado Hatzmann, a expresa preocupacion cu esey por ta traumatico pa e famia, tanto Ministerio Publico como defensa a insisti cu esey ta un parti esencial pa un tratamento husto y completo. Na final hues a confirma cu e imagen lo ser presenta durante e tratamento di e caso.

E plan di tratamento ta inclui dos dia di audiencia: e prome dia (20 di februari) ta dedica na presentacion di e caso y e evaluacion di e prueba; e segundo dia (23 di februari) ta pa e rekisitorio di Ministerio Publico, presentacion di argumentonan di defensa y e uso di e derecho di “spreekrecht” di e famia. Den caso cu e tempo no ta suficiente, un dia adicional (26 di februari) lo ser asigna.