Mientras cu expectativa entre comunidad di Aruba ta hopi halto pa e caso awe mainta, entama pa parlamentario Mike de Meza (AVP) contra Departamento di Impuesto relaciona cu screening pa bira minister, por ta asina cu prensa – y pueblo – lo no haya oportunidad di scucha e caso.
Esaki pasobra, segun un oficial di corte a bisa noticieronan local, e naturalesa sensitivo di e caso ta nifica cu lo por tuma e decision pa hues scucha e caso cu porta cera. Ademas, casonan di belasting usualmente no ta abierto pa pueblico. E ora prensa no lo haya oportunidad pa scucha e caso y informa pueblo di e desaroyo.
Sinembargo, te awo, nada ta confirma.
Manera Bon Dia Aruba a reporta den pasado, parlamentario De Meza a entama un caso contra DIMP pa motibo cu no a pasa screening pa bira minister den Gabinete AVP-Futuro. Segun abogado di De Meza, no tin ningun debe habri cu lo haci cu e minister no por ricibi un bon resultado di comportamento fiscal. Sinembargo, tur cos ta indica cu e fiscalnan di DIMP no ta di acuerdo cu e ponencia aki.
Den dos Editorial dedica na e tema aki, Bon Dia Aruba a cuestiona kico e candidato pa ministro ta pensa di gana cu un caso contra Servicio di Impuesto, si e departamento, den persona di Inspector, a entrega e rapport caba na e Formador y na Gobernador, manera ley ta exigi?
Nos ta referi aki tambe na e comentario, parcialmente incompleto, di un parlamentario cu ta declara cu e rapport di Servicio di Impuesto a bay pa Formador, mientras tanto tambe Promer Ministro, y ta opina cu e lo mester actua. Esey ta berdad den e sentido di articulo 8, inciso 2, di e ley di screening cu ta bisa: “Den caso cu no ta propone un candidato pa nombramento como ministro, e formador ta informa su persona mas pronto posible por escrito di esaki, cu mencion di e motibo di esey.”
Loke e comentario parlamentario no ta informa ta cu e ley (articulo 2, inciso 2) ta bisa: “E peticion pa implementacion di e investigacionnan na cual ta referi den e promer inciso ta ser haci pa e Formador. E resultado di e investigacionnan ta ser comparti cu e Formador y Gobernador.”
Kico esaki ta significa, teniendo na vista henter e proceso di evaluacion, cu ta encera varios rapport confidencial di varios instancia? Cu e uniconan cu ta haya e rapport di Servicio di Impuesto ta e personanan menciona den e ley: Formador y Gobernador. Y kico nos ta mira den corte awor? Ta pidi huez un veredicto riba un rapport confidencial cu no ta supposed di ta den man di e candidato mes, ni di ningun otro persona cu no ta e dosnan menciona den ley.
Esaki por haci cu e caso den corte por tuma un rumbo inespera.
