Caso Utilities vs Hoevertsz sumamente educativo…

Nos ta bibando den un epoca turbulento, pero hopi educativo. Cambio di gobierno semper ta bin cu varios caso den corte, unda hopi aspecto di mal gobernacion ta bin dilanti. Tambe den cierto caso cosnan cu si ta atende bon, di cual tambe por siña. E caso di Utilities vs Hoevertsz den cual tabatin sentencia ayera, ta uno asina, pa varios motibo.

Un di e problemanan cu semper tur gobierno lo enfrenta, no solamente den corte pero tambe en general, ta cu ‘gobernacion ta continuacion’ y esey ta trece cune cu reproche na e gobierno anterior semper por ‘bounce back’ na un manera fastioso pa e gobierno nobo. Bo mester asumi tur responsabilidad, tambe pa acto o accion di e gobierno anterior, pa cual bo no kier ta responsable pero… bo ta.

Den e caso aki, e gabinete nobo a bin topa cu un maneho cu cual nan no ta di acuerdo, pero na e momento ey, loke bo mester haci ta formula maneho nobo y confronta e director(nan) cu e maneho nobo cu abo kier mira. Si nan ta mustra oposicion pa bay implementa e maneho nobo, y hasta ta pone obstaculo pa implementa esaki, anto ta bin espacio pa tuma medida contra e director(nan). E caso actual ta mustra uno mas unda demasiado lihe ta yega na e conclusion cu e colaboracion lo no ta posible, sigur si haya algun asunto financiero cu ta parce ‘no kosher’ y cu ta parce bon municion pa bay guera cu nan. Y den e caso aki, esaki ta resulta insuficiente y contraproductivo.

Prome cu a bay guera lo mester a pensa bon kico algun cambio importante cu a tuma lugar lo tabatin pa e caso aki, y aparentemente no a haci esey. Por ehemplo, cu gobierno anterior a introduci un Codigo di Gobernacion Corporativo (Corporate Governance Code) na 2014, den cual ta describi un papel mas activo pa gobierno (e accionista unico di Utilities) pa acopla maneho di e compania, y su subsidiarionan Elmar y WEB, cu maneho strategico di energia di gobierno. E facultadnan regla aki ta bay mas leu cu loke ley ta stipula como facultad di un accionista den cualkier compania. Esey tin su pro y su contra. E ta facilita un gobierno implementa su maneho te mas den detaye dentro di e compania, pero e ta limita tambe e posibilidad pa gobierno, como accionista, haya un ‘counterbalance’ den e director(nan) cu mester defende e interesnan di e compania na prome lugar, pero si teniendo cuenta cu interes general. Por presenta un caso unda gobierno, den e afan pa implementa su maneho, ta haci daño na e compania, por ehemplo obligando e compania usa fondonan di e compania na manera indebido pa otro asunto. Esey ta e momento cu e director(nan) mester actua pa contraresta esaki. Si di esaki ta surgi un conflicto, cu e consecuencia cu ta retira e director, e lo mester cana e caminda legal pa haya razon.

Otro punto remarcable ta cu atrobe nos ta presencia un caso unda gobierno no ta maneha e reglanan di bon gobernacion interno al pie de la letra, y esey ta importante. Den e veredicto aki hues ta bolbe constata cu gobierno, como accionista, no ta confronta e director di antemano cu e maneho nobo cu ta propone, cu tur derecho, y tuma un tempo pa mira si colaboracion ta posible. E afan pa tuma medida di biaha suponiendo cu ta imposible pa traha cu un persona, sin cu bo a purba, ta algo mortal den corte. Ironia ta cu den un anterior caso di retiro, di e director di WEB, e mesun director aki tabata protagonista na e otro banda, unda tampoco a respeta derecho di e director ey pa ser scucha. Ta parce cu pareu ta trata di gobierno, independiente di e partido na mando, hende ta kere cu semper nan tin razon y ta simplemente ‘haci cos’. Den corte e metodonan aki no ta yuda.

Kico nos por siña di tur esaki? Cu ta sumamente importante pa realisa bon, ora di asumi gobernacion, con pa atende e asuntonan teniendo na vista cu tur cos, bon y malo, cu a sucede anteriormente. Ta como si fuera abo mes a haci esey, aunke ta maneho cu bo por ta desprecia profundamente. Den e situacion ey, no tin otro manera cu drenta den e papel cu mester asumi, di accionista den e caso aki, y sigui minuciosamente e pasonan cu mester sigui. Esey ta implica na prome lugar, cambia maneho oficialmente, via e caminda corecto. Loke nos ta mira mucho hopi ainda cu ora ta drenta gobernacion, ta pensa prome na ken di e amigo y famianan ta pone na cual puesto. Esaki bao di e argumento di semper cu ‘nos mester tin nos hendenan di confiansa eynan’. No, ta mas recomendable cuminsa mira kico ta loke e otro gobierno a laga tras na maneho, pasobra si bo no cambia esey, ta esey tin. No bin conta hues cu bo a cambia maneho anto e no ta riba papel. Y, manera den e caso aki, por tin elemento cu e otro a laga atras cu bo por usa tambe. Manera e poder grandi cu gobierno anterior a crea pa dirigi Utilities. Cambia esey? Of us’e abo tambe?

 

You May Also Like

Carrying capacity bao atencion atrobe

Kico a cambia den 13 aña? Aruba Tourism Authority (ATA) a tuma iniciativa pa ...

Ta bira tempo pa re-inventa Y sigui planifica futuro

‘No hay mal que por bien no venga’. Un expresion cu nos tur conoce, ...

editorial 2_15_1.jpg

SERVICIO PUBLICO DI MAL CALIDAD…

Pero sector priva ta bon anto? Nos a (casi) custumbra caba cu servicio publico, ...

Banco Central moderadamente positivo

Banco Central a publica ayera su Economic Outlook pa aña 2018 y ta importante ...

Caso Ibis a clausura… Y kico nos a siña?

A yega un final na e prome fase di e proceso penal den e ...