Vocero di Ministerio Publico ta informa cu Fiscal mayor a saca un recompensa di 5.000 florin pa e tip di oro cu lo hiba na detencion y huicio di e sospechoso of sospechosonan den tiramento na Wayaca.
Den e tiramento aki manera ta conoci tabata tin un morto y un herido. E persona cu a drenta e cas y los tiro, ta fugitivo desde e momento ey anto husticia ta sali na punto di bista cu e ta na Aruba ainda. E investigacion den e caso ki ta den marcha den man di un team grandi bao guia di fiscal. Recherche ta investigando tur posible pistanan.Den interes di investigacion, no lo wordo duna mas informe na e momento aki segun Ministerio Publico.
Yiu tambe den cas
Sinembargo den prensa a sali cu tabatin un di tres persona den e cas momento cu e sospechoso a drenta arma. Y cu esaki ta trata di e yiu di e pareha. E mama aparentemente a pidi pa no tuma e bida di su yiu y asina e mes a wordo tira 3 biaha y fayece na e siteo. E tata tambe a ricibi un bala y ta den hospital ainda.
Ley mas stricto
Minister di Husticia Arthur Dowers a anuncia cu e kier traha hunto cu Ministerio Publico riba ley mas pisa pa combati criminalidad. El a declara na Bon Dia Aruba diamars cu e cantidad di atraco arma ta aumentando (esaki ta conta e uzo di tur arma, pues tambe arma blanco).
Ayera e minister tambe a saca un comunicado. Aki bou por lesa un parti di esaki:
“Nos tur mester biba mas consciente di loke ta pasando rond di nos, den nos bario, riba comportacion straño di nos bisiñanan y di esunnan den nos bario ya cu e ta forma mas efectivo pa autoridad bira actua mucho mas preventivo.
Ta di lamenta cu ta un grupo chikito den nos comunidad ta causante di e susto grandi aki y e forma con nos por para e grupo aki, ta di uni forsa hunto cu autoridadnan hudicial y asina pone man riba e hendenan aki si por, prome cu nan comete na fechorianan.
Nos tin cu traha hunto, nos tin cu lucha hunto y mas cu tur cos, nos tur mester ta mas atento na e tipo di desaroyonan aki, y semper keda atento pa cualkier comportacion sospechoso di e antisocialnan aki.
Departamentonan di Husticia tur dia ta trahando hunto no solamente pa soluciona crimennan pero tambe pa preveni esakinan y ta sumamente dificil pa anticipa comportacion malo di algun hende cu no ta respeta regla y leynan di nos comunidad.
Ta den e cuadro aki nos tur tin cu bira mas atento, nos tin cu bira mucho mas alerta di loke ta pasando rond di nos, sea den nos bario, na un evento social of deportivo, caminda cu lo por topa cu tiponan cu ta mustra sospechoso den nan comportacion. Alertando autoridadnan cu e sospechonan aki, e lo por yuda na preveni cu e tipo di abusonan grandi aki ta tuma luga.
E crimennan contra comunidad tin cu wordo combati cu cooperacion di comunidad caminda nos tur por duna autoridadnan un aporte esencial den prevencion di e cosnan malo aki.”
