Weekend ultimo, riba rednan social diferente persona a haci denuncia di casonan lamentable di maltrato di cacho. Esaki a hala atencion di usuarionan, cu a bin hunto pa purba busca un solucion.

Un ciudadano a denuncia cu a observa un cacho den mal condicion na un cas bandona.

“Please yuda mi,” e usuario, H.T. a publica riba Facebook. “Unda mi por reporta maltrato… un cas bandona… lagando un ser sin awa sin cuminda.”

Adhunto, H.T. a comparti un potret unda por observa un cacho extremadamente flaco, mara cu un cadena, y rondona pa desperdicio den loke ta mustra di ta un cas bandona.

Den e comentarionan, un usuario a identifica e adres como Catiri 4H. Otro usuario, N.M. a indica cu e mes lo bay e lugar pa duna awa y cuminda na e cacho.

Algun ora despues, e mesun usuario N.M. a comparti un update den cual a conta cu a confronta e doño di e cacho. “Djis pa boso sa Piet Truck su cacho!” el a bisa, agregando cu e doño a yega tur rabia.

N.M. a puntra e persona pakico no a hiba e cacho, cu ta visiblemente den mal estado, na veterinario. E contesta tabata cu no tabatin placa pa hib’e. Y cu e no a corta huña di e cacho pasobra “no mester.”

Alabes, a bira conoci cu hende a purba di bay cu e animal, pero e doño no tabata dispuesto pa entrega e cacho na e rescatistanan. No tabata conoci te ciere di redaccion si autoridadnan a interveni.

Ademas, ayera tardi, a denuncia un otro caso di maltrato y negligencia di cacho, e biaha aki na Sero Patrishi. Na un cas a bin haya un cantidad di cacho, tur na cadena of den haula, algun di nan mara den solo.

Nan tabata den mal condicion cu carpata y purga.
Rescatistanan inmediatamente a tuma contacto cu e doño, kende no tabata mustra di compronde kico e problema ta. Entre tanto ta purbando di yuda e animalnan. Pa esaki a solicita remedi di carpata y purga, vitamina B12 cu mester duna tur dia, y un boluntario cu lo por bin tur dia pa duna cuminda y cambia e awa di e cachonan.

Den e caso aki, diferente fundacion y persona a bin dilanti ofreciendo ayudo, manera e remedi pa purga y carpata, y cuminda. Loke falta ta un boluntario cu por bay tur dia pa duna e cachonan cuminda y awa limpi.

Algo notable ta cu mientras autoridadnan di Aruba no ta tuma accion den defensa di e cachonan aki, e comunidad mes, a traves di boluntario y fundacionnan (non-profit) cu ta traha basa riba donacion, si ta tuma responsabilidad y ta bin hunto pa purba yuda lo mas cu ta posible. Pues un yamado ta bay na henter comunidad pa yuda unda cu por, sea mediante boluntarismo of donacion.

Di su banda, activista di bienestar di animal, Tamara B., a post informacion valioso riba kico mester haci na momento cu topa cu un situacion di maltrato di cacho (of otro animal).

1. Evidencia: potret, video, audio.
2. Nota e nomber corecto di e persona cu ta causando e abuso of negligencia.

3. Nota e adres corecto, y si ta posible, haya un “pin” di e adres.

4. Reporta na Polis di Bario. Yama warda di polis di bo districto y bisa nan cu bo tin potret.

Den caso cu e animal ta den hopi mal condicion, ta recomenda:

1. Hiba e animal directamente na un veterinario.

2. Duna e animal e asistencia medico cu e mester.

3. Den caso cu mester pone e animal drumi, laga haci un autopsia.

4. Pidi e veterinario pa traha un rapport pa polis.

5. Post riba Facebook pidiendo e paginanan cu ta encarga cu animal na Aruba pa yuda cubri e costo di e veterinario y tag tur corant y fundacion den esaki.