Dimitri Halley (1).JPG

Actualmente Bon Dia Aruba a tuma nota di varios caso tras di otro unda cu muchanan jong ta lantando contra nan mayornan y cosnan ta bay for di man. Bon Dia Aruba a bishita psycholoog Dimitri Halley cu tin basta aña di experiencia den su profesion, desde 1993 pa ta exacto, kende ta bisa cu e ta hopi preocupa di con frecuente e casonan aki ta biniendo pa dilanti.

Algo cu antes tabata sagrado, cual ta respet pa bo mayornan, awendia ta parce cu e no ta sagrado mas.  Segun e psycholoog, ta tuma hopi pa un yiu bay agredi su mayornan anto mirando con frecuente esaki ta pasando, ta parce manera un grens cu a wordo pasa cual ta birando alarmante. Sr. Halley ta bisa cu esaki ta indicacion cu nos problemanan mental no ta wordo atendi debidamente.

Casonan
Diasabra anochi riba 2 di october tabata tin un caso na Sero Blanco na unda un hoben a wordo deteni pa menasa su mesun mama cu morto. Segun declaracion di e mama, nan tabata tin un discusion cu a bay for di man unda cu despues e hoben a menas’e cu morto.  Algun dia prome cu esey un yiu homber a wordo deteni na San Nicolas pa maltrata su tata cu bat di baseball te cu e mester a wordo transporta pa hospital cu urgencia. Esaki ta djis algun di e casonan cu a tuma luga ultimamente y Bon Dia Aruba no por a logra haya un declaracion di e personanan pa e edicion aki.

Sr. Halley ta splica cu psicologonan te ainda na Aruba no ta den un seguro general siendo cu e parti psikiatrico ta hopi importante den salud di un persona y no solamente e parti di medicamento. ”Esaki ta un desaroyo hopi fastioso pero hopi importante pa toca riba dje pa por ofrece mas profundidad riba e rais di e problemanan aki.”

Mas regla no ta yuda
Sr. Halley ta splica cu autoridadnan manera polis tambe mester mira e problemanan aki for di un perspectiva mas profundo y concentra den yuda e hoben na soluciona e problemanan interno pasobra mas castigo, regla y menasa ta bay sigui crea un ‘backlash’. ”Mester sinta cu nan y duna atencion na e dolor patras di e criminal. Nan ta uza droga y alcohol pa verdoof e dolor cu nan tin y riba esaki bo mester concentra.”

 Psicologicamente, actonan di criminalidad y abuso ta un forma di ‘acting out’ segun sr. Halley, of den otro palabra, un forma di pidi pa auxilio. Den caso di hobennan cu ta lanta contra nan mayornan, den mayoria di esaki ta resalta cu e hoben tin un dolor hopi profundo cu nan ta sconde paden di nan mes, y nan ta expresa esaki cu violencia.  Segun sr. Halley, e idea di solamente wak e comportacion criminal y concentra riba e castigo no ta bay stop e origen for di unda e problemanan aki ta wordo crea. ”Ora cu un hoben no ta bayendo bon na scol, ta haci falta di un mayor of no tin e tipo di apoyo ey, nos ta ripara cu nan ta cuminsa tapa e dolornan aki cu comportacion criminal.  Mas polis riba caya, mas castigo y regla no ta drecha e origen for di unda e problemanan aki ta saliendo.”

 

No tin berdadero cura mental

Segun sr. Halley, scolnan no ta ”drop out factories”, sino mas tanto ”push out factories” pasobra hopi hoben no ta haya e exito cu nan merece.  Scolnan no ta opera den un manera mas personal cu e mucha y esaki no ta totalmente un falta di e sistema educativo, nan ta djis haci nan trabao. E institucionnan aki ta estableci cu e funcion cu bo mester studia, siña y gradua pa despues bo busca bo posicion den sociedad, y bay traha. Pues na scol, ta bira dificil pa cada alumno ricibi atencion special mirando cu tin tanto  mucha tur aña y educadornan ta haci te unda cu nan por pa yuda tur mucha y laga e scolnan draai debidamente.

 

Manera hopi hende sa bisa, educacion ta cuminsa principalmente na cas anto si tin algun problema den hogar, scolnan no a wordo diseña pa yuda bo cu esaki. Den hopi famia na Aruba, segun sr. Halley e mayoria di hoben ta crece cu un solo mayor cual tambe ta crea problema. ”No tin un berdadero cura mental riba e tereno aki. Terapia unda cu bo por trata cu dolornan real, no t’ey. Aworaki, primordialmente ta e medicina of ‘droganan legal’ cu mi no ta bisa cu nan no tin nan luga, pero nan ta eigenlijk djis yuda verdoof e rais di e dolor.”

 

Un otro factor cu sr. Halley a trece pa dilanti ta e fenomeno di keda pensa cu Aruba ta un ‘One Happy Island’. Riba un nivel di psicologia profundo,segun sr. Halley esaki ta causa cu bo ta bay hustamente atrae lo contrario. ”Un hende cu kier ta contento tur ora, ta bay atrae sufrimento den su bida pasobra e sentimentonan ey ta un ‘spacing out’ di locual e persona realmente ta sintiendo. Si bo aplica esaki colectivamente, un pais cu semper kier propaganda su mes cu un identidad falso di ta contento tur ora, ta bay sigui atrae situacionnan opuesto pasobra y bo por mira esaki actualmente.”