Como “un incidente hopi lamentabel,” asina Parlamentario y Lider di Fraccion di MEP, Rocco Tjon, a cualifica e echo cu e preso hopi peligroso, Gerson Martina, a huy di KIA.
E ta haya cu un caso di e embergadura aki mester haya su debido atencion. No solo for di e mandatario y di e instituto encuestion, pero di Parlamento mes. Ya cu den menos di un luna dos preso a huy, e prome tabata Erick Schneider y awor Gerson Martina.
Ayera mes a sali un carta for di Parlamento den direccion di Minister di Husticia, Andin Bikker. Den e carta –segun Parlamentario Rocco Tjon- a wordo manda un serie di pregunta tocante e casonan reciente di presonan cu a huy for di nos instituto coreccional KIA. Ainda no tin mucho claridad riba e causa con e fugitivonan a logra huy.
Riba dianan 15 y 16 di augustus tin reunion tentativamente plania den Parlamento, caminda gobierno lo bin duna un splicacion con na ta ehecuta presupuesto.
Parlamentario Rocco Tjon ta kere cu e dianan ey por bira e momento ideal pa Parlamento por haya un splicacion di Minister Bikker. E no ta descarta cu esaki por sosode no den reunion publico, pero si den un reunion cera, unda mas informacion por wordo divulga, teniendo cuenta cu siguridad nacional.
Fondo pa KIA
Den e carta manda ayera pa minister tin un serie di pregunta pa evalua si ta necesario pa parlamento lo mester realoca cierto fondonan pa mitiga e eventual causa cu mas preso ta huy di KIA.
Ta hopi importante pa Parlamento pa nan wordo informa debidamente kico a tuna luga, pero tambe kico a ocasiona cu esaki por a tuma luga keto bay. Nan kier sa e motibo ya cu si ta necesario Parlamentario Tjon a bisa cu, por lo menos, su fraccion lo ta disponibel pa aloca fondo pa evita cu e mas preso por sigui huy for di KIA.
Nan a tuma nota cu e Director actual di KIA a anuncia un investigacion interno cu ta andando. Parlamento lo manda pregunta relaciona cu e incidente aki na e mandatario di husticia pa asina nos organo legislativo por wordo informa mas lihe posibel di e resultado di e investigacion aki.
Prioridadnan na KIA
Parlamentario Tjon kende pa un temporada a fungi como Director di KIA, prome cu el a bira politico, a declara cu e casonan di e fugitivonan di KIA por tin di haber cu diferente motibo. Pero el a prefera di no specula, sin cu prome nan por haya informacion di e mandatario di Husticia. Ya cu e causa por ta varios, infrastructura, falta di tecnologia, scarsedad di personal y/of proceduranan cu no a wordo implementa manera deber ser, etc..
Otro aspecto urgente pa atende cune ta e programa pa e detenidonan cu mester draai di un manera structural den KIA. Pero e ‘formatie plan’ ta uno hopi importante den e instituto aki. E reto mas grandi di e plan aki ta cu nunca bo por complace tur hende. Esaki eventualmente lo trece cune cu bo mester deal cu malcontento di algun personal y cu sindicato. Pero e ta haya cu pa medio di dialogo, nan tur lo por yega na bon entendimento pa ehecuta e formatie plan nobo.
Tocante e construccion di un KIA nobo -segun e parlamentario- nan tin pregunta haci por escrito tocante e asunto aki. Den nan preguntanan a wordo pidi un memorandum financiero, ya cu si den caso cu no tin espacio financiero of esaki ta limita, nan por cera e capitulo aki, y cuminsa pensa riba otro alternativanan pa mitiga e riesgonan cu tin den KIA actualmente.
