Recientemente, Oficina Central di Estadistica, CBS, a publica su Indice di Prijs di Consumo pa luna di maart ultimo. Den esaki a menciona cu e ‘core inflation’ a registra un aumento di 2.2 porciento.
E CPIC (core inflation) – CPI excluyendo e efecto di energia y cuminda – a registra na Maart 2025 un aumento di 2.2%. E indice di energia – cu ta consisti di e productonan: electricidad, awa, gasolin y diesel – a registra un reduccion di 2.2%.
E indice di cuminda a registra un aumento di 1.9%.
Kico ta CPIC?
E CPIC (core inflation) of e inflacion basico ta un porcion di e inflacion unda cierto articulonan cu tin movimientonan di prijsnan volatil ta wordo exclui, manera productonan alimenticio y energetico. Na momento cu e inflacion basico wordo calcula, e componentenan mas volatil ta wordo elimina di e inflacion total.
E indice di e inflacion basico ta sirbi pa evalua e tendencia riba medio y largo plaso di e nivel general di prijsnan. Pa ahusta maneho monetario, hopi economista ta enfoca riba e tasa di e inflacion basico, como cu esaki ta permiti un evaluacion mas profundo di e procesonan di inflacion reciente den e economia. E
CPIC ta wordo calcula door di compara e indice promedio di e periodo di e 12 luna mas reciente cu e promedio di e periodo di 12 luna anterior (Promedio anual).
Elaboracion di un CPI tin tres meta principal.
1. Como un metodo di calculo pa compensa empleadonan pa motibo di perdida di poder di compra, ahustando nan salarionan, cu e proporcion di e cambio porcentual di CPI, locual ta conoci como indexering. 2. Como un mecanismo pa ahusta componentenan di e producto domestico bruto (GDP) di termino nominal pa termino real den Cuentanan Nacional. (Por ehempel door di elimina e efectonan di cambionan di prijs di e balor di consumo)
3. Como un medio pa gobiernonan y/of banconan central fiha obhetivonan inflacionario.
