Recientemente, Oficina Central di Estadistica (CBS) a publica e Indice di Prijs di Consumo pa luna di december 2025. Den esaki, a nota cu e nivel minimo di entrada necesario pa biba na Aruba, e ‘bestaansminimum’, a registra aumento, tanto pa famia como pa un persona riba su mes.
E bestaansminimum pa un hogar consistiendo di dos (2) adulto y dos (2) mucha (edad 0-14) na December 2025 ta Afl. 5,537, un subida di Afl. 18 compara cu November 2025 (Afl. 5,519). E bestaansminimum pa un hogar di un (1) adulto ta Afl. 2,636, un subida di Afl. 8 compara cu November 2025 (Afl. 2,628).
Kico ta un “Bestaansminimum” y con e ta ser ahusta?
CBS ta defini un bestaansminimum como e nivel minimo di entrada cu ta ser percibi necesario pa un persona of famia por funciona den sociedad di un manera adecuado y socialmente aceptabel. Ora nos usa e definicion “Bestaansminimum”, en realidad ta ser referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta ser considera necesario pa biba un bida liber di privacionnan basico” (Nacionnan Uni).
Un indice a ser crea pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna. Cada luna e indice aki ta ser ahusta, a base di e prijsnan di alimento, paña, vivienda, transporte y otro articulonan den e canasta.
E bestaansminimum actual ta ser basa riba e rapport “Bestaansminimum 2010” publica door di CBS na December 2010, y cual ta ser actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (edad 0-14).
