Recientemente, Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di Maart 2025.

Indice di Prijs di Consumo pa luna di Maart 2025

E CPI pa luna di Maart 2025 ta 109.50, loke ta representa un aumento di 0.4% compara cu e indice di Februari 2025 (109.09).

E cambio di e CPI pa e ultimo diesdos (12) luna (Maart 2024 te cu Maart 2025) ta 0.1%, un reduccion di 1.7 punto di porcentahe (ppt) compara cu e periodo corespondiente di aña pasa (1.8%).

E promedio anual (ultimo 24 luna) di e tasa di inflacion pa e periodonan di Maart 2022 te cu Maart 2023 y Maart 2024 te cu Maart 2025 ta 1.4%, un reduccion di 0.7 ppt compara cu e 2.1% registra den e periodonan di Maart 2021 te cu Maart 2022 y Maart 2023 te cu Maart 2024.

Durante e luna aki, ocho (8) di e diesdos (12) sectornan a registra aumento di prijs. E aumentonan cu tabatin e mayor efecto riba e CPI a wordo registra pa e sectornan di “Vivienda” (0.5%) y “Restaurant y hotel” (1.8%), causando un efecto di respectivamente, 0.14 y 0.09 ppt. E aumentonan den e sectornan restante a contribui cu un efecto di 0.26 ppt riba e CPI di Maart 2025.

E aumentonan aki a wordo contraresta parcialmente door di principalmente un reduccion den e indice di e sector di “Transporte” (-0.5%) cu a contribui cu un efecto di -0.07 ppt riba e CPI di Maart 2025. E reduccionnan den e sectornan restante a contribui cu un efecto di -0.04 ppt riba e CPI di Maart 2025.

E aumento den e sector di “Vivienda” a wordo causa principalmente door di un aumento di 2.3% den e categoria “Mantencion y reparacion di vivienda”, causando un efecto di 0.13 ppt. E aumento den e sector di “Restaurant y hotel” a wordo causa principalmente door di un aumento den e categoria “Servicio di alohamento” (114.6%), causando un efecto di 0.07 ppt. E reduccion den e sector di “Transporte” a wordo causa principalmente door di un reduccion den e categoria “Compra di vehiculo” (-1.3%), causando un efecto di -0.06 ppt.

Canasta di consumo

E canasta di consumo di e CPI ta consisti di 408 bienes y servicionan. Compara cu Februari 2025, 46.3% di e bienes y servicionan aki a conoce un aumento di prijs causando un efecto di 0.88 ppt, mientras cu 37.0% ta mustra un reduccion di prijs, cu a contribui cu un efecto di -0.50 ppt y pa e restante 16.7% no tabatin cambio den prijs. Prijsnan di bienes (0.4%) y prijsnan di servicionan (0.4%) conoce aumento compara cu Februari 2025 y a causa un efecto di respectivamente, 0.23 y 0.15 ppt riba e CPI di Maart 2025.