Recientemente, Oficina Central di Estadistica, CBS a publica e Indice di Prijs di Consumo (CPI) pa luna di maart 2025. Den esaki, a nota e cambionan den indice di Cuminda y servicio di catering, cu a registra un caida di prijs.
E indice di “Cuminda & servicio di catering” a registra un caida di 0.1% na Maart 2025, despues di a registra un caida di 0.2% na Februari 2025.
E indice di “Cuminda na cas” (-0.3%) a registra un caida, unda cinco (5) di e diesun (11) indicenan di e gruponan di cuminda na cas a baha na Maart 2025. E indice di “Fruta” a conoce e caida di mas grandi (-4.4%) na Maart 2025.
Otro caidanan significante a wordo registra den e indicenan di “Berdura” (-2.1%) y “Pisca y otro cuminda di lama” (-1.0%). E subida mas grandi a wordo registra den e indice di “Batata, yuca y batata dushi” (3.5%) na Maart 2025.
E indice di “Cuminda pafo di cas” a registra un subida di 0.3% na Maart 2025. Na Maart 2025, “Cuminda na cas” y “Cuminda pafo di cas” como grupo, tabatin un caida di prijs di 0.1% compara cu Februari 2025 y hunto tabatin un influencia di -0.01 ppt riba e CPI, mientras cu e restante bienes y servicio hunto a experencia un subida di prijs di 0.5% y tabatin un efecto di 0.39 ppt riba e CPI.
