Recientemente, Oficina Central di Estadistica (CBS) a publica informacion tocante e Indice di Prijs di Consumo pa juni 2025. Den esaki a nota cu prijs di awa cu coriente no a cambia compara cu e luna anterior, pero prijs di gasolin a aumenta cu 2 cen.
Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na Juni 2025 e prijs promedio pa bari di petroleo (US$68.60) a conoce un subida di US$ 6.52 (10.5%) compara cu Mei 2025 (US$ 62.08).
Prijs di electricidad y di awa no a cambia compara cu Mei 2025. Consecuentemente, e prijs promedio di electricidad pa vivienda a keda Afl. 263.67, mientras cu e prijs promedio di awa pa vivienda a keda Afl. 168.73.
Prijs di gasolin a registra un subida di Afl. 2.20 cen (1.0%) na Juni 2025 y a causa un efecto di 0.04 ppt riba e CPI. Prijs di diesel a registra un caida di Afl. 2.40 cen (-1.3%) na Juni 2025 y a causa un efecto insignificante riba e CPI.
Na Juni 2025, utilidad, gasolin y diesel como grupo, tabatin un subida den prijs di 0.2% compara cu Mei 2025 y hunto tabatin un influencia di 0.04 ppt riba e CPI, mientras cu e restante 404 bienes y servicio hunto, a conoce un caida di prijs di 0.2% y tabatin un efecto di -0.21 ppt riba e CPI.
