CEDE Aruba: ”Aruba Doet 2016 tabata exitoso y basta productivo”

Aruba Doet ta un proyecto di CEDE Aruba hunto cu Oranje Fonds cu a cuminsa den aña 2013 cu 87 trabao boluntario. E aña aki tabata e di 4 edicion di Aruba Doet caminda tabata tin un crecimento di 154 diferente trabao boluntario den 1 fin di siman. Den e lista aki tabata tin fundacionnan, scolnan, diferente asociacionnan y clubnan di deporte cu a participa e aña aki. Daniel Tecklenborg, Director di CEDE Aruba ta conta Bon Dia cu nan ta hopi contento tambe cu nan no tabata tin solamente trabaonan di mantencion so, pero e biaha aki tabata tin fundacionnan y diferente organisacionnan cu a yuda otro realisa diferente sorto di proyecto y actividadnan social. Aruba Doet ta wordo organisa riba  1 fin di siman pa aña y segun Tecklenborg e 2 dianan aki ta haci un impacto masha grandi mes.

Claro cu por haci mas den 1 aña, pero segun Tecklenborg ta splica , e evento aki ta mustra bo simbolicamente cu ora bo trece hente positivo y energia positivo hunto bo por cambia masha hopi mes den tiki tempo. Tin un lista demasiado largo pa menciona di compania cu a apoya y yuda masha hopi mes cu Aruba Doet y di parti di CEDE Aruba y Oranje Fonds ta gradici enormemente pa e apoyo y sosten. Segun Tecklenborg, e total di ora boluntario cu a wordo traha e fin di siman cu a pasa ta alomenos un 18.000 ora cu si bo conta esaki na un suma pa ora e lo ta hopi halto mes. No a haci mucho cos nobo e aña aki fuera di enfoca mas riba Clubnan di Deporte pa motibo cu aña pasa a concentra mas riba e skolnan y segun Tecklenborg nos Clubnan di Deporte tabata falta hopi atencion e aña aki.

Locual ta fantastico tambe segun Tecklenborg ta cu no ta na Aruba so e evento aki a tuma luga pero tambe na Curacao, Bonaire, St.Maarten, Statia y Hulanda cu ta haci esaki un evento na nivel di reino.  Bo por  bishita e pagina di web www.cedearuba.org pa mira kico tur e otro islanan a traha riba dje e fin di siman aki. Tur e trabaonan cu a wordo haci a wordo financia door di Oranje Fonds cual segunTecklenborg ta un suma ariba di 150.000 Florin cu nan a hinca pa e 2 dianan aki y pa esaki tambe ta hopi agradeci. Cu un suma chikito di mas o menos 1000 Florin pa cada trabao cual segun Tecklenborg no ta zona manera hopi, pero si bo tin suficiente union y apoyo seguramente ta masha hopi mes bo por haci cu esaki. Hopi luganan a haya extra sponsor y tambe extra material, nan a haya descuento y hasta cosnan por nada cual a haci e proceso aki uno hopi mas eficiente.