CEDE Aruba ta lansa COVID-19 Community Guide y registracion di boluntario

Diabierna pasa, CEDE Aruba a lansa un guia nobo ariba e plataforma ORG.aw. E guia ta duna informacion ariba tur sorto di servicio online y disponibel na cas.

Esaki ta pa motibo cu Rond mundo paisnan ta crea websites cu ta duna un bista di tur servicio pa comunidad durante e situacion di COVID-19.

Na e momento aki, e mensahe pa nos comunidad ta: keda cas. Na e mesun momento, hende mester tin acceso na diferente servicio y informacion, entre otro maneho di supermercado, supermercado cu ta trece compras cas, restaurant cu ta trece cuminda cas, servicionan di emergencia, asistencia social di diferente instancia, servicio di botica, maneho di compania di utilidad, maneho di banco y tambe informacionnan educativo  y entertainment durante e situacion actual. P’esey CEDE Aruba ta lansa un version nobo di ORG.AW cu tur e informacion aki.

Ora ta subi ORG.AW, por klik ariba ‘community service during COVID-19’. Bo ta haya links pa tur sorto di servicio. E website no ta perfecto ainda, pero e lo wordo amplia durante e siguiente dianan. Ariba e website, CEDE Aruba tambe ta haci posibel pa diferente organisacion por duna tips tocante topico practico, entre otro con pa economisa, comunicacion na cas, educacion di yiu den e momentonan aki. Ariba ORG.AW tambe tin e opcion cu organisacion of compania por upload nan informacion. Un danki special na Multimedia N.V. cu ta yudando nos den record time pa hinca esaki den otro. Si tin pregunta tocante ORG.AW, por busca like e facebookpage di ORG.AW y manda message via facebook messenger.

CEDE Aruba tambe ta haci un yamada pa boluntarionan. Ariba e mesun site ORG.AW, ora bo ta klik ariba e menu ariba of or abo scroll full abou, bo por registra bo mes como boluntario. Tin diferente formulario cu bo por yena pa registra, entre otro como enfermero/enfermera, pero tambe pa yuda trece cuminda pa hende den isolacion, yuda cu e telefon pa hende di 60+, servicio online, empaketa cuminda, etc. Asina nos ta crea un database di hende cu por conecta na diferente organisacion of hende individual cu mester di ayudo. CEDE Aruba sa cu nos mester ta hopi cauteloso cu trabou boluntario den e situacion di COVID-19, pero nos ta bay tin mester di boluntario. Si bo no ta logra registra online, tambe por tuma contacto cu CEDE Aruba entre dialuna cu diabierna, 1or te 5or di merdia. E number di telefon ta 582-7666.

Un otro punto ta cu CEDE Aruba ta wordo acerca pa hopi compania na e momentonan aki. Nos ta haya esaki hopi positivo y nos ta encurasha boso pa keda tuma contacto cu nos. Corda cu nos tuma yamada, entre dialuna cu diabierna, 1or te 5or di merdia, na e mesun telefon 582-7666. CEDE Aruba ta traha hunto cu varios NGO y nos lo haci nos best pa conecta boso donacion cu esnan cu mas mester di dje awor, tambe pensando ariba e siguiente lunanan. Danki na tur cu kier haci un diferencia.