Recientemente Basha Foundation conhuntamente cu Ateliers ‘89, Stichting Rancho y Vibration PR a celebra 10 aña di Poetry Night na Flor di Oriente.

 E evento a encera diferente aspecto. Entre otro, un exhibicion duna pa Aterliers ‘89 en colaboracion cu diferente artista local den un cunucu house. Jhowell Maduro a exhibi diferente potret experimental cu tabata resultado di un tayer duna pa e academia mes. Irvin Aguilar, un artista di Mexico residencia temporalmente riba nos isla, tambe a contribui cu un masker grandi traha cu tecnica di wood-cut.

Banda di e trabou di dos dimension exhibi, tabatin vaas blanco cu preto den e cunucu house y varios instalacion artistico traha pa artistanan local. Bexx Santos do Nascimento a tuma un camber pa su instalacion interactivo, unda el a pidi pa personanan skirbi un deseo of secreto riba un sticky note y plak esaki riba muraya. E cantidad di sticky notes aki tabata crece durante anochi.

Desiree Sporkslede tambe a traha riba un instalacion unda cu el a exhibi diferente productonan di lechi. Jess Wolff a presenta un instalacion artistico cu diferente escultura y piezanan di moda. Tabatin un exhibicion di e resultado final di e proyecto tempo pa Click di Stichting Rancho. E proyecto aki tabata encera cu diferente grupo di hende, mucha, hoben y adulto a tuma potret den bario di Rancho pa siña con pa tuma potret.

Poetanan
Entre e diferente tecnicanan y medionan artistico cu a wordo exhibi, e elemento cu a trece tur cos hunto tabata e poetanan cu a declama nan arte. E organisacion tambe a duna espacio pa muchanan expresa nan poesia. Amanda Britten, Dahlia Sophia y mas mucha a presenta nan poemanan cu hopi emocion. Reanne Ras a cera e parti di muchanan cu un poesia cu a expresa cu nos tur ta un rasa humano. Man den man teni nos kier ta uni.

E poetanan local cu a presenta tabata uno cu a refleha diversidad. Pearl Dumfries a deleita e publico presente cu su bos, Charles Croes a presenta un monologo intimo, Leonardo Philips a anima publico, splicando cu nos tur ta bida.

Entre e poetanan aki tambe a presenta Charlotte Ellis, Henry Dabian, Ruthy Vrieswijk, Luis Villegas, Munye Oduber-Winklaar, Reginad de Palm, Ephrayim Odor y Lily Clarisa Henriquez Maduro.

E invitado special di e anochi tabata e poeta internacional Alysia Nicole Harris. Sra. Harris hunto cu Danyeli Rodriquez Del Orbe tabata e poetanan internacional cu a presenta specialmente pa e evento aki. Sra. Harris ta un poeta cu ta purba inspira pa medio di duna bos na hende muhe. Sra. Harris a presenta 5 poema, cada un tocando diferente topiconan relevante pa tur hende muhe y te hasta hende homber. Sra. Harris ta renombra internacionalmente y a yega di presenta su poesia na Nacionnan Uni. Su buki How Much We Must Have Looked Like Stars To Stars, tabata disponibel pa cumpra durante e anochi. Su buki a yega di haya varios premionan na nivel internacional.

Por a nota cu durante e anochi tabatin gruponan cu no a bay specificamente pa e poesia, y tabata dificil pa por concentra riba e palabranan di e poetanan na varios momento pasobra di e buya.

Beach Lama na cierto momento a expresa durante su poesia ‘cu ami te aki pa expresa mi mes y si boso no ta respeta esaki mi ta djis laga e mic cay’. Esaki debido na e echo cu durante presentacion di sra. Harris, tabatin hopi buya rond di bar.

Un anochi varia, unda te hasta bandanan local Santo Blanco y Datapanik a toca live.

Potretnan di e evento ta cortesia di Rebeca Santos do Nascimento.