Ayera ta marca 20 aña cu Wikipedia den Papiamento/u a ser crea. Pa celebra e logro aki, Wikipedia na Aruba, den colaboracion cu departamento Arubiana-Caribiana di Biblioteca Nacional, a tene un charla dia 25 di maart den cual a enfatisa e importancia pa sigui preserva nos cultura y lenguahe den contexto di un mundo cada bes mas dependiente riba tecnologia.

E anochi a enfoca mayormente riba e idioma Papiamento, unda varios instancia a resalta e esfuersonan andando pa preserva nos idioma—algo cu den perspectiva di e fundacionnan aki ta bayendo atras. A subraya cu si no ta continua of pone atencion adecuado riba e preservacion y promocion di nos idioma, Aruba en especial ta core riesgo di perde su idioma materno pa otronan cu durante tempo ta bira mas y mas papia entre generacionnan mas jong.

Fundacion Lanta Papiamento ta señala importancia di lesa den Papiamento

E prome presentacion a bin di Fundacion Lanta Papiamento, unda linguista Sr. Ramon Todd Dandarè a duna un splicacion cortico tocante e ortografia etimologico di Papiamento. Sr. Ramon ta enfatisa cu Papiamento/u ta un solo idioma cu tin dos diferente ortografia. Pa Papiamento—papia solamente na Aruba—ta conoci cu su ortografia ta en gran parti etimologico, al contrario cu Papiamentu cual ta mayormente fonologico.

Den su presentacion, Dandarè a cubri varios regla di nos idioma materno. Den su splicacion, e linguista a keda pone enfasis riba e importancia di conoce y preserva nos idioma, bisando cu ta esencial pa hende sigui lesa den Papiamento pa asina por conserva su uso pa e proximo generacionnan.

Fundacion Lanta Papiamento regularmente ta haci tayernan riba nos idioma, unda sa explora e desaroyo linguistico. Di e manera aki, e fundacion ta haci su parti den e esfuerso pa standarisa, preserva y promove uso corecto di Papiamento.

Arubiana-Caribiana ta priorisa preservacion cu su coleccion digital

Den e esfuerso di preservacion, Arubiana-Caribiana tambe ta hunga un rol sumamente importante pa conserva nos idioma, historia y cultura. E departamento ta cay bao Biblioteca Nacional y ta encarga principalmente cu archiva documentonan tocante historia, cultura y idioma di Aruba como tambe region Caribe.

Cu su coleccion digital (coleccion.aw), e departamento ta priorisa preservacion den un mundo cu ta birando cada bes mas dependiente riba tecnologia.

Na october di aña 2022, Archivo Nacional, Biblioteca Nacional y UNOCA a firma un acuerdo pa coopera riba e tereno di digitalisacion di e historia, cultura y herencia di Aruba. Na october 2023, coleccion.aw a ser lansa oficialmente, y te dia di awe tin mas cu 200.000 documento cu ta trata e historia, lenguahe y cultura di Aruba y otro paisnan den Caribe (Hulandes). Riba e website aki, lo por haya textonan antiguo, video, audio y miles di potret antiguo y contemporaneo.

E website tambe ta dividi su contenido den diferente coleccion, incluyendo di diferente instancia y sub-coleccionnan tratando diferente topico. Durante e charla, hefe di Arubiana-Caribiana, Zetsia Ponson, a enfatisa e trabao cu e departamento ta haci den preservacion, notando cu ainda tin hopi mas documento cu mester digitalisa ainda.

Pero e hefe di Arubiana-Caribiana tambe ta pone enfasis riba e rol cu comunidad tin den preservacion di nos cultura y historia. P’esey e departamento ta organisa loke Ponson a yama conversatorionan, unda comunidad por reuni y papia tocante diferente topico cu ta toca e historia y desaroyo di nos cultura. Te awor a organisa apenas dos, pero Ponson ta bisa cu esaki sigur ta algo cu lo keda organisa pa trece comunidad hunto.

Wikipedia: 20 aña promoviendo uso di Papiamento

Manera a menciona, e charla diaranson anochi a tuma luga conhunto cu e celebracion di Wikipedia den Papiamento/u, cual tin 20 aña ta promove uso di nos idioma materno por medio di textonan traha pa boluntarionan tocante nos cultura y historia.

Dia 13 di februari 2025, e proyecto temporal Wikipedia Riba Aruba a ser crea pa preserva y comparti e herencia di Aruba door di conocemento habri. E proyecto aki tabata programa di dura 18 luna largo, y ta anticipa su clausura na juni binidero. Cu e iniciativa aki, e meta ta pa educa comunidad di Aruba tocante e poder di plataforma online Wikipedia pa preserva nos herencia.

Durante e ultimo aña, Wikipedia Riba Aruba a tene varios tayer unda comunidad di Aruba por siña ‘upload’ texto of imagen den Papiamento riba e plataforma global Wikipedia, cual ta conoci pa tin miyones di informacion liber tocante diferente topico.

Wikipedia ta reconoce como un di e fuentenan liber cu ta confiable, y e plataforma ta sigui liñanan di guia streng pa asina sigura informacion corecto y adecua. E tayernan cu Wikipedia Riba Aruba ta duna tambe ta educa personanan riba e reglanan aki, y ta stimula boluntarionan di contribui na e iniciativa di preservacion por medio di skirbi, edita of modera contenido riba e plataforma PAP-Wikipedia.

Desde november 2025, PAP-Wikipedia tin 5.000 articulo, den cual 1.073 ta skirbi den Papiamento.

UNESCO ta señala importancia pa Papiamento existi online

Un otro instancia presente na e charla tabata UNESCO, cual a hala atencion riba e peligronan di e era digital, y pakico ta importante pa Papiamento como lenga materno chikito existi online.

UNESCO ta un cuerpo internacional cu ta bao di e Organisacion di Nacionnan Uni (UN) y ta promove cooperacion internacional den educacion, ciencia y cultura pa fortalece paz y desaroyo sostenible.

Preservacion di lenguahe tambe ta un aspecto hopi importante di su trabao. UNESCO a crea Dia Internacional di Lenga Materno dia 21 di februari. E cuerpo tambe a bin cu un ‘roadmap’ global pa multilingualismo den era digital y guia global pa educacion multilingualismo, cu e meta pa sigura cu diversidad linguistico ta sobrevivi y florece den un moderno cu ta keda cambia y modernisa.

E enfoke aki ta specialmente relevante pa idiomanan chikito manera Papiamento, cual segun vocero di UNESCO Ray-Anne Hernandez por core riesgo di extincion si no ta tuma accion adecuado pa conservacion.

Den e ultimo decadanan, Aruba su poblacion a crece fuertemente cu e desaroyo di sector turistico, unda awendia varios lenguahe ta prevalente den comunidad. Ingles y Spaño a bira specialmente dominante, unda e generacion nobo ta adoptando e lenguahenan aki mas den nan vocabulario diario.

Hernandez a señala e peligro di esaki, bisando cu exposicion di contenido online den Ingles ta influencia e desaroyo linguistico di hopi hoben Rubiano. P’esey ta enfatisa cu e esfuerso pa preserva nos idioma mester probecha di e cambio global den direccion tecnologico.

 

UNESCO su mensahe ta cla: Si un idioma no presenta online, e ta core riesgo di bira relevante den futuro.

Hernandez ta enfatisa e importancia pa amplia exposicion di Papiamento na hobennan, creando mas recurso digital den nos idioma materno, tin mas representacion riba nivel internacional.

Cu e aumento di Inteligencia Artificial (AI), Hernandez ta expande riba e peligro cu Papiamento ta enfrenta debi na un falta di recursonan digital. Manera e ta splica, plataformanan di AI no ta reconoce Papiamento suficientemente bon y sa genera textonan incorecto. Esaki pasobra no tin suficiente material den Papiamento online. Di su banda, UNESCO ta keda haci yamado riba uso husto di idiomanan den tecnologia di AI.

Digitalisacion ta e manera mas util pa preserva nos herencia

A pesar di e esfuersonan importante cu e fundacionnan aki ta haci, a keda cla cu preservacion di nos idioma y herencia ta sigui enfrenta reto y ta rekeri mas atencion di gobierno, sectornan riba e isla y comunidad mes.

Mundo ta keda cambia, y tecnologia a yega na un punto caba cu e ta domina bida diario di tur persona na mundo. Como isla chikito, Aruba mester traha hopi mas duro pa no keda atras den e desaroyonan rapido aki. Y mirando cu tur cos ta bayendo den digitalisacion, ta parce cu Aruba mester probecha di esaki pa asina preserva loke ta di nos.