(NLTimes)—Un estudio pionero a revela cu celulanan cu ta produci insulina den un laboratorio por posiblemente cura un forma severo di diabetes tipo 1, dunando speransa nobo na pashentnan cu te awor ta depende di organonan dona cu ta scars. E resultado preliminar—cual investigadornan ta describi como prometedor—ta indica cu e avance aki por eventualmente haci tratamento disponibel pa hopi mas hende cu e malesa auto-immuun, segun NOS.

Diabetes tipo 1 ta diferente di tipo 2, cual ta mayormente relaciona cu biehes y estilo di bida. Tipo 1 ta desaroya ora cu e sistema inmunologico destrui e celulanan den e pancreas cu ta produci insulina. Ta calcula cu tin 120.000 hende den Hulanda cu diabetes tipo 1. Aunke mayoria di pashentnan por controla nan sucu cu medicamentonan, nan ta enfrenta un riesgo mas halto pa daño na wowo, riñon, curason y slagadernan.

Pa un grupo chikito di pashentnan di cual nan malesa ta asina complica cu medicamentonan no ta traha, e unico opcion tabata un transplante total di pancreas of transplante di celula di isla (islet cell), cual ta usa celulanan productor di insulina recolecta di donantenan fayecido. Anton Schaddelee, un pashent cu diabetes, a conta NOS cu despues cu el a haya un transplante di celula di isla, e por regresa completamente na bida diario despues di lucha cu e forma mas severo di e malesa.

Pashentnan cu ta haya cualkier tipo di e transplante aki por logra remision completo. Si esaki no ta e caso, nan por al menos mantene nivel di glucose den sanger stabiel cu medicamentonan. Pero medicamento pa keda limita pa cierto hende pa motibo cu organonan dona ta na escasez.

E estudio nobo ta mustra un posible solucion. Cientificonan a logra desaroya celulanan di isla productor di insulina den laboratorio, usando e stemcelnan pluripotente—cual ta celulanan primitivo cu por modifica su mes na cualkier tipo di celula den curpa. Segun e resultado, mayoria participantenan cu diabetes tipo 1 severo tabata liber di e malesa un aña despues di haya infusion cu e celulanan aki cria den laboratorio.

“E logro berdadero ta cu celulanan di isla crea di e stemcel den laboratorio por cura diabetes,” segun Dr. Eelco de Koning, doctor y profesor di diabetologia na Leiden University Medical Center, a conta NOS. “Esaki ta mustra cu den futuro, un suministro ilimita di celulanan por ta disponibel pa tratamento.”

Tin mester mas investigacion pa logra haya suficiente evidencia cientifico prome cu e metodo aki por ta parti di cuido standard. Den november binidero, un centro nobo di investigacion cu e nomber Cure One lo habri den Leiden, cu apoyo financiero di Stichting Diabetes Onderzoek Nederland. E instalacion lo uni investigacionnan tocante terapia cu stemcelnan y interaccion cu e sistema inmunologico, y ta anticipa pa fortalece tanto LUMC como Leiden Bioscience Park como centro Europeo pa innovacion den tratamento di diabetes.

Un di e metanan principal di Cure One ta supuestamente pa eventualmente pone e terapia disponibel pa tur pashent cu diabetes tipo 1. “Actualmente, receptornan di celulanan di donantenan fayecido—of di stemcelnan, manera den e estudio—mester usa medicamento cu ta suprimi e sistema inmunologico pa henter bida pa evita cu nan curpa rechasa e celulanan,” De Koning a conta NOS.

E medicamento aki ta debilita e defensa natural den curpa, haciendo cu riesgo pa infeccion y otro efecto secundario ta subi. Esaki ta trece e pregunta si e tratamento ta realmente beneficioso pa pashentnan cu un forma menos complica di diabetes.

“E reto ta pa descubri con nos por adapta e stemcelnan y e sistema inmunologico pa e sistema inmunologico laga e celulanan nobo trankil,” De Koning a splica. “Esaki por ser logra tambe si nos crea prome stemcelnan di e persona mes cu diabetes tipo 1, y despues cria celulanan ‘personalisa’ pa nan. Door di uni tur e experiencia den Cure One, nos lo haci tur esfuerso pa pronto yega na un proximo logro.”