Censo ta enfrenta presion grandi debi na aumento drastico den proceso di inscripcion pa prome biaha

Dienst Burgerlijke Stand & Bevolkingsregister, Censo Aruba, ta enfrenta actualmente un presion considerable den su operacion diario debi na un aumento drastico den e cantidad di persona cu ta inscribi pa prome biaha. Segun Director di Censo, Sharin Luydens, e aumento inespera den demanda a crea retraso den e proceso di inscripcion, pasobra e capacidad actual di e departamento no ta suficiente pa procesa e gran volumen di solicitantenan cu a presenta den un periodo relativamente corto.

Censo ta un institucion gubernamental importante cu ta encarga cu mantene e registronan oficial di poblacion di Aruba. E departamento ta responsable pa registra evento civil manera nacemento, matrimonio, divorcio y fayecemento, y tambe pa mantene un administracion actualisa di e poblacion residente na Aruba. Ademas, Censo ta emiti documento oficial manera paspoort, ID-kaart, rijbewijs y extractonan di registro di poblacion. Tambe e institucion ta responsable pa suministra informacion oficial for di e registronan di poblacion y pa apoya den proceso electoral y referendum ora esaki ta necesario.

Debi na e funcion amplio di e departamento, casi tur proceso administrativo cu tin di haber cu identificacion personal of registro civil ta pasa pa Censo. Esey ta nifica cu e institucion ta un punto central den e relacion entre ciudadano y gobierno.

Durante hopi aña Censo a logra mantene un ritmo relativamente stabiel den e cantidad di inscripcion cu e departamento tabata procesa cada aña. Historicamente e cifra di inscripcion tabata alrededor di 3.000 pa aña. E cantidad aki tabata di acuerdo cu e capacidad di personal disponible den e afdeling responsable pa e proceso.

E afdeling cu ta maneha e proceso di registro di poblacion tin varios empleado, pero solamente un di nan ta dedica pa traha riba inscripcion pa cierto periodonan, pasobra e otro empleadonan tin responsabilidad pa otro proceso importante manera registracion di nacemento, matrimonio, divorcio y otro servicio civil. E division di trabou aki tabata funciona eficientemente mientras e demanda tabata mantene relativamente stabiel.

Sinembargo, recientemente e situacion a cambia drasticamente. Luydens a splica cu e cantidad di prome permiso y inscripcion pa prome biaha a subi abruptamente te mas cu 6.000 pa aña. Esey ta representa casi e dobel di e volumen habitual di inscripcion cu e departamento tabata custuma di maneha.

E aumento aki ta conecta principalmente cu e proceso di legalisacion di persona indocumenta na Aruba, e trayecto Hunto pa Progreso. Durante e trayecto aki, un gran cantidad di persona indocumenta a ricibi nan prome permiso di estadia, cu automaticamente ta rekeri nan pa registra oficialmente pa prome biaha den e registro di poblacion na Censo.

E proceso aki a crea un aumento inmediato den e carga di trabou pa e departamento. Mientras otro institucion cu ta involucra den e trayecto di legalisacion, DIMAS, a ricibi personal adicional pa yuda maneha e proceso, Censo no a haya refuerso similar na e mesun momento.

Luydens a indica cu recientemente e minister responsable a aproba e posibilidad pa recluta personal adicional pa Censo. Sinembargo, e proceso administrativo pa habri vacatura, evalua candidato y haci nombramento ta tuma tempo, algo cu ta nifica cu e refuerso di personal no lo ta inmediatamente disponible.

Mientras tanto, e departamento ta obliga pa maneha e aumento di demanda cu e capacidad actual cu tin.

Actualmente Censo tin un capacidad promedio pa procesa aproximadamente 26 inscripcion pa dia. Cada inscripcion mester ser revisa cuidadosamente y registra den e sistema oficial di poblacion. Un caso relativamente simple, manera un reinscripcion, por tuma aproximadamente 15 minuut pa ser procesa.

Sinembargo, un e proceso pa inscripcion di prome biaha normalmente ta dura mucho mas. Dependiendo di e complehidad di e caso y e documentonan presenta, e proceso por tuma entre 30 te 40 minuut si tur documento ta completo y corecto. Ora e cantidad di solicitantenan ta subi abruptamente, e limitacion di tempo y personal naturalmente ta crea acumulacion di caso pendiente.

E situacion aki a causa retraso principalmente den e servicio di inscripcion pa prome biaha. Pa e ekipo di Censo, e circunstancia actual ta particularmente frustrante. Durante hopi aña e institucion a logra construi un reputacion di duna servicio eficiente y confiabel na e comunidad. E aumento repentino den carga di trabou a complica e habilidad pa mantene e nivel habitual di servicio.

Adicionalmente Cenos ta enfrenta un reto pa loke ta trata citanan, specificamente un fenomeno di bendemento di cita. Luydens a splica cu Censo ta tuma paso pa proteha e proceso di cita y mantene un sistema husto pa tur ciudadano. El a indica cu nan ta haciendo tur lo posible pa blokia e-mail di tramitadornan of otro persona cu ta sospecha di ta ocupa citanan pa stroba e proceso normal. Ademas, Censo ya a presenta recomendacionnan cu ta indica ki recurso y medida adicional ta necesario pa por atende cu e reto actual cu e institucion ta enfrenta.

A pesar di e presion riba e servicio di inscripcion, e mayoria di otro servicio di Censo ta sigui funciona relativamente normal. Luydens a splica cu Censo a nota un aumento den demanda pa paspoort y rijbewijs. E subida den solicitud pa paspoort ta relaciona cu e cambio cu a ser introduci na 2014, ora cu validez di paspoort a ser amplia di 5 pa 10 aña, algo cu awor ta causa un peak den renobacion.

Na mesun momento, el a sigui splica, Censo a tuma responsabilidad pa emiti rijbewijs for di polis na fin di november 2020, momento cu ya tabata tin un retraso significativo, pero e aumento actual den e dos servicio aki tabata algo cu e departamento tabata prepara pe. Aunke e tempo di espera pa un cita a subi un poco, e tipo di fluctuacion ta normal durante periodonan di demanda halto den hopi paisnan.

Por ultimo, Luydens a enfatisa cu Censo ta haci un yamado na tur ciudadano pa revisa nan documentonan cu suficiente anticipacion y haci nan cita na tempo. Segun e departamento, ta responsabilidad di cada persona pa controla nan documento manera paspoort of ID-kaart y solicita renobacion na tempo pa evita dificultad. Censo ta remarca cu, aunke e institucion ta haci tur lo posible pa yuda e comunidad, no ta posible pa haci excepcion pa ningun persona durante periodonan di gran demanda, pasobra tin un limite di cuanto persona por ser atendi pa dia. Tambe ta importante pa recorda cu paspoort ta ser produci na Hulanda, algo cu ta nifica cu despues di haci solicitud e documento por tarda varios siman prome cu e yega Aruba pa entrega.

Luydens a subraya cu e unico servicio cu realmente a ser afecta pa e aumento repentino di demanda ta e proceso di inscripcion pa prome relaciona cu miles di prome permiso cu a ser entrega recientemente a traves di e trayecto di Hunto pa Progreso. E situacion aki tabata algo cu e departamento no tabata prepara pe den e escala actual. A pesar di esaki, tur otro servicio di Censo ta continua funciona normalmente y ta sigui atende ciudadano manera custumber, manteniendo e nivel di servicio cu e institucion a construi durante hopi aña.