Durante fin di siman migrantenan di Mexico sin documento cu ta biba na Merca y cu ta separa di nan famia, a reuni cu nan famia den un encuentro hopi cortico na frontera di El Paso, na Texas cu obhetivo di manda un mensahe di union pa presidente Donald Trump.
E reunion ta di tres encuentro cu tin cu caracteristica asina na mesun luga, y awo a tene luga na Rio Grandi, cu ta separa frontera entre Mexico y Merca. Den linea di frontera tur famia di dos banda di riu a participa na un abraso di 3 minuut.
E reunion a ricibi nomber di “Abraso no muraya”, eynan a participa 370 famia di origen Mexicano, cu ta biba sin documento di migracion na estadonan manera California, Texas, Colorado y Arizona.
Di banda di Mexico e famia cu a biaha pa frontera di Mexico pa participa na encuentro tabata bin di estadonan manera Veracruz, Sonora, Sinaloa, Durango, México, D.F., Puebla y Chihuahua, entre otro.
“Hopi tempo cu mi no por mir’e. Mi mama tabata yora so. Mi mama no a logra papia cu nos”, Heriberto, Mexicano di Puebla cu ta biba na Phoenix (Arizona) a bisa mientras hopi lagrima tabata core na su cara.
“Mi tabatin seis aña sin por mira mi mama”, Heriberto a bisa. E ta traha den un restaurant na Phoenix., manera coki.
Hopi famia a bin cerca di nan ser keri, cu orden y den grupo cerca di frontera pa duna un abraso, y asina transmiti un mensahe di unidad pa e presidente nobo di Merca, Donald Trump.
Organisado di actividad a construi manera un brug temporal cu palo y tire pa e famianan por cana trankil den awa di e riu ey.
E encuentro a sucede cerca di brug internacional Paso di Noord, cerca di frontera di El Paso (Texas) y Juarez (Mexico).
Cu e actividad aki, cu a wordo organisa pa red fronterisa di derecho humano y instituto fronteriso speransa, nan tabata busca pa haci un impacto na Washington D.C., cu por logra disminui e discurso anti – migrante di Trump.
