(AP) — Al menos 500 migrante a aterisa na Florida Keys durante ultimo dianan, den loke oficina di sheriff local a describi ayera como un ‘crisis’.
Disturbio economico, escasez di cuminda in aumento di inflacion na Cuba y otro partinan di Caribe ta impulsando e ola mas recien di migracion. Durante weekend, 300 migrante a yega na e Dry Tortugas National Park, un parke tiki pobla como 113 kilometer west di Key West. E parke tabata cera pa asina personal di ley y medico por evalua e grupo prome cu move nan na Key West, e parke a tweet.
Separa, 160 migrante a yega riba boto na otro partinan di Florida Keys durante weekend di Aña Nobo, oficialnan a bisa. Ayera, 30 persona den dos grupo nobo di migrante a keda haya na Middle Keys.
Den un comunicado di prensa, sheriff di Monroe County, Rick Ramsay a critica e respuesta federal na e aumento den yegada di migrante, bisando cu nan tabata poniendo presion riba recursonan local. Control di Frontera Mericano a bisa oficina di sheriff cu e respuesta federal na algun yegada di migrante mester warda un dia, segun e comunicado.
“Yegada di refugiado ta rekeri hopi recurso di Oficina di Sheriff mientras nos ta yuda nos partnernan di cumplimento di ley federal sigura cu e migrantenan ta bon di salud y ta safe”, segun Ramsay, kende hurisdiccion di su oficina ta inclui Florida Keys. “Esaki ta mustra un falta di plan di trabao di gobierno federal pa deal cu e problema di migracion masivo cu tabata por predeci.”
Oficialnan na Dry Tortugas National Park a bisa cu nan tabata spera pa e parke ta cera pa varios dia pa motibo di e espacio y recursonan necesario pa atende cu e migrantenan. E parke nacional ta den tip sur di Merca continental – y ta atrae scuba diver y snorkel pa su rif di coral, neishi di turtuga di lama, pisca tropical y barconan hundi.
“Igual cu otro lugarnan den Florida Keys, e parke recientemente a mira un aumento di hende yegando riba boto for di Cuba y aterisando riba e islanan di Dry Tortugas National Park”, segun Servicio Nacional di Parke a bisa den un comunicado di prensa.
Ademas di e yegadanan na e parke nacional durante weekend, 160 otro migrante a yega den Middle y Upper Keys. Al menos 88 di e migrantenan ta di Cuba, segun Agencia di Aduana y Proteccion di Frontera Mericano a bisa riba Twitter.
Agentenan di Control di Frontera y Wardacosta patruyando Sur Florida y e Keys ta experimentando e escalacion di migracion via boto di mas grandi den casi un decada, cu centenares di intercepcion den lunanan recien, mayoria di hende for di Cuba y Haiti.
